Mo tumiše – Letšatši la 13

Re kwa kudu ka Bakriste bao ba hlomarwago ka tumelo ya bona. Ba lahlelwa kgolegong, ba tingwa magae a bona le dithoto gomme ba swanetše ba tšhabe go boloka maphelo a bona. Ba bangwe ba lefa tefo ya godimodimo ba a bolawa, ka dinako tše dingwe ka ditsela tše sehlogo. Ka Afrika Borwa, tlhomaro ga se ye e feteletšego, eupša go na le twantšho ye e oketšegago kgahlanong le Bokriste maemong a mmušo.

Paulose o bolela ka mo go latelago ka se: “Gobane lena le filwe sebaka sa go direla Kriste, e sego fela ka go dumela go yena, eupša le ka go tlaišwa ka lebaka la gagwe” (Bafilipi 1:29). Go tlaišwa letšatši le letšatši la bophelo bja gago ka lebaka la Kriste le tumelo ya gago go bolelwa gape ke Jesu go Thuto Thabeng.

O bolela gabotse gore go tlo ba le tlhomaro ka gobane o nyaka go phela gabotse le go dira sa maleba gape se se nepagetšego. Mehlala ya mehleng yeno: go na le ditlamorago tše mpe go batho bao ba ganago go patela pipa-molomo gore ba hwetše tirišano ya kgwebo – ba a kgethollwa gomme ba palelwa ke go dira letseno. Mmegi wa ditiro tše di sego molaong o a hlorišwa le go bitšwa ka maina goba o swanetše go phela a tšhogile.

Jesu o re batho, bao ba dirago se Modimo a se nyakago ba “lehlogonolo” gomme o ba hlohleletša ka kholofetšo: “gobane mmušo wa Modimo ke wa bobona” (Mateu 5:10).

O lemoša gape gore dadumedi ba tla rogakwa le go hlomarwa le go latofatšwa ka dilo ka moka tša maaka le bobe ka lebaka la gagwe (Mateu 5:11-12). Go fa mohlala, Jesu o biditšwe bjalo ka sejato le setagwa gomme Johanese Mokolobetši a lahlelwa kgolegong ka gobane a kgadile Heroda ka go tšea mosadi wa buti wa gagwe. Mehleng ya rena, badumedi bao ba sa nwego madila, ba gana go kgatha tema ditirong tše ba dumelago gore di tla senya seriti sa Modimo go bona, goba bao ba pakago ka boloki bja Tate ba bitšwa baikaketši goba bafišagela-thoko.

Lega go le bjalo Jesu o re hlohleletša le go re holofetša gore: “Ba lehlogonolo ke lena … Thabang le hlalale, ka gore moputso wa lena ke wo mogolo legodimong” (Mateu 5:11-12).

Paulose o dumelelana le Jesu: “Gomme ditlaišego tše dinyenyane tša lebakanyana tše re di kwago tše, di tla re tlišetša letago la go ya go ile, le le fetago dilo tšohle. Gobane re lebeletše tše di sa bonwego, e sego tše di bonwago. Gape tše di bonwago ke tša lebakanyana fela, kganthe tše di sa bonwego tšona ke tša go ya go ile” (2 Bakorinte 4:17-18).