Bible Society of South Africa
Dithulaganyo tša go bala
Matšatši a šupa a tutuetšo go tšwa go Kutullo
Matšatši a šupa a tutuetšo go tšwa go Kutullo - Letšatši la 3
Gerhard Lindeque

Matšatši a šupa a tutuetšo go tšwa go Kutullo - Letšatši la 3

Ke nna! Se boife

(Di)temana ya Bibele

KUTOLLO 1

Johanese o bona Jesu ponong

9Nna, Johanese, ngwanabolena, molatedikalena wa Jesu, ke na le lena matshwenyegong le mmušong le kgotlelelong. Ke ile ka ikhwetša ke le sehlakahlakeng sa Patmose, ka ge ke be ke ile ka bega lentšu la Modimo le therešo ye Jesu a e utolotšego. 10Ya re ka Letšatši la Morena ka tsenwa ke Moya, gomme ka kwa lentšu le legolo le nkego ke mollo wa phala ka morago ga ka 11le re: “Tše o di bonago di ngwale ka pukung, gomme o romele puku yeo diphuthegong tše di lego metseng ye e šupago ye: Efeso, Smirna, Pergamone, Tiatira, Sardese, Filadelfia le Laodisea.”

12Ke ile ka retologa gore ke bone yo a bolelago le nna, gomme ka bona dihlomamabone tše di šupago tša gauta. 13Gare ga tšona go be go na le selo se se swanago le motho. Se be se apere purapura ya go fihla dinaong, se ipofile ka lepanta la gauta kgareng. 14Moriri wa sona e le wo mošweu bjalo ka wulu ye tšhweu le bjalo ka leswela, le mahlo a sona a le bjalo ka kgabo ya mollo. 15Maoto a sona a be a phadima bjalo ka mphiri wo o phadimišitšwego moubelong, gomme lentšu la gagwe lona nke ke modumo wa meetse a mantši. 16Se be se swere dinaledi tše di šupago ka seatla sa la go ja, gomme molomong wa sona go etšwa tšhoša ya magale a mabedi. Sefahlego sa sona se be se taga bjalo ka letšatši ge le taga kudu. 17E rile ge ke se bona ka wela fase pele ga sona ka ba bjalo ka motho yo a hwilego. Sona sa mpea seatla sa sona sa la go ja sa re go nna: “O se tšhoge. Ke nna Mathomo le Mafelelo a dilo ka moka. 18Ke nnaena wa go phela. Ke be ke hwile, fela bjale ke phelela sa ruri. Ke laola bahu le bodulabahu. 19Bjale ge, ngwala tše o di bonago, tše di diregago gonabjale le tše di tlago direga ka morago. 20Se ke sona sephiri sa dinaledi tše di šupago tše o di bonago ka seatleng sa ka sa go ja, le sa dihlomamabone tše di šupago tše tša gauta: dinaledi tše di šupago tše ke barongwa ba Modimo ba diphuthego tše di šupago, gomme dihlomamabone tše di šupago tše ke diphuthego tše di šupago tšeo.”

KUTOLLO 1:9-20NSO00Bula go Mmadi wa Bibele

Johanese o ikhwetša sehlakahlakeng sa Patmose. Go ba ga gagwe sehlakahlakeng a nnoši go bontšha tlaišego ya gore badumedi ba nako ka moka ba swanetše go kgotlelela. Bjalo ka ge Jesu Kriste a sa amogelwa, le balatedi ba gagwe le bona ba ka se amogelwe. Lefase ka mehla le tla leka go homotša lentšu la kereke. Johanese o, le ge go le bjalo, rwalwa ke Moya. Ka se, re netefaletšwa gore re ka itemogela bogona bja Moya wa Modimo mo gohle.

Re itemogela bogona bja Modimo, magareng ga tše dingwe, ka Letšatši la Morena – ka Sontaga – ge badumedi ba kgobokana go keteka tsogo ya Jesu Kriste. Ka letšatši le, Modimo o sa bolela le kereke ya ggawe ka lentšu la gagwe, ka tsela ye e kgethigilego. Kereke e bitšwa diphuthego tše šupa gomme e emelwa ke dihlomamabone tše šupa. Ge e le gabotse, kereke ke seetša sa lefase.

Temaneng ye, bjalo ka go diEbangedi, Jesu Kriste o bitšwa motho yo a swanago le Morwa wa Motho. Tlhalošo ya ponagalo ya gagwe ga e a swanela go hlalošwa ka botlalo. E gatelela fela letago la Jesu Kriste le maatla morago ga tsogo ya gagwe bahung. Khomotšo go kereke ke gore Jesu Kriste ke Yena yo a Phelago le gore o na le kereke ya gagwe. Seswantšho sa tšhoša go tšwa molomong se re netefaletša gore Jesu Kriste o bolela le kereke ya gagwe go tšwa legodimong. O laola kereke ya gagwe bjalo ka kgoši e swere molamo wa bogoši ka seatleng sa gagwe sa go ja, sammaletee, o šireletša kereke ya gagwe, dinaledi tše šupa.

BoModimo bja Jesu Kriste bo molaleng go tšwa go mantšu a: “Ke nna! Se boife”. Ka mantšu a, Modimo o netefaletša kereke ya gagwe. Jesu Kriste o fentše lehu. O na le rena ke lentšu le Moya wa gagwe.

Nagana ka:

  1. 1.Lentšu la kereke le homotšwa bjang lehono?
  2. 2.O itemogela kae bogona bja Modimo?

Bible Society of South Africav.4.26.9
RE HWETŠE GO