Matšatši a šupa a tutuetšo go tšwa go Kutullo - Letšatši la 2

Diphuthego tše šupa di emela kereke ya dinako ka moka le mafelo. Nomoro ya šupa e bontšha gore ye ke kereke ya Modimo. Modimo gape o bolela le kereke ya gagwe lehono – le wena le nna. Go se swane le se dikgoši tša lefaseng di ka se dirago balatedi ba bona, Modimo o dumediša kereke ya gagwe ka mantšu a kgaugelo le khutšo. Ga re a swanela go boifa bogona bja Modimo, le ge Modimo e le yo maatla le wa go sa felego.

Meoya e šupa pele ga setulo sa bogoši sa Modimo ke tsela e nngwe ya go bolela ka Moya wa Modimo, goba Moya wo Mokgethwa bjalo ka ge re mo tseba. Gomme, tsepelelo e go Jesu Kriste. O tlile go re bontšha yo Modimo ka nnete e lego yena. Ka gona, Jesu ke hlatse ye e botegago. Ka tsogo ya gagwe bahung, Jesu Kriste o bontšhitše gore Modimo o na le maatla kudu le go buša dikgoši tša lefase.

Se ke khomotšo e kgolo go badumedi ba dinako ka moka, bao ka dinako tše dingwe ba phelago ka tlase ga maemo a thata a dipolitiki. Le ge go le bjalo, ka tumelo ya rena go Jesu Kriste, re na le boikarabelo bjo bo kgethegilego. Mmušo wa Modimo o swanetše o be nnete ka tsela ye re phelago ka yona. Go se swane le baprista ka go Testamente ye Tala, badumedi ba ba tlwaelegilego bjale ba na le tumelolo ya go bolela ka go lebanya go Modimo.

Bjalo ka ge maru gantši a amantšhwa le bogona bja Modimo ka Bibeleng, go tla ga Jesu godimo ga maru, mo, go bontšha bogona bja Modimo le kereke ya gagwe. Nako le nako ge re lebelela godimo gomme re bona maru, re a netefaletšwa gore Modimo o na le rena. Le ge go le bjalo, bao ba sa bonego Jesu Kriste ka tsela ye, ba tla itemogela kwelobohloko. Modimo ka mehla o gona gomme ke ka lebaka leo a bitšwago Alfa le Omega.

Nagana ka:

1. 1.Re itemogela bjang bogona bja Modimo?
2. 2.Re ka dira bjang gore bogona bja Modimo bo bonagale kudu?