Matšatši a šupa a tutuetšo go tšwa go Kutullo - Letšatši la 1
Se boife
(Di)temana ya Bibele
KUTOLLO 1
Puku ya Kutollo e ngwadilwe go tutuetša badumedi bao ba bego ba boifa. Ba be ba boifa ka gobane mmušo wa nako yeo, Baroma, ba be ba le sehlogo go bona. Ba be ba boifa batho ba bona, Bajuda, bao ba ilego ba sa ba amogele ka gobane ba bile Bakriste, gomme ba boifa mehuta ka moka ya maatla ao, go ya ka pono ya nako yeo, a bego a na le khuetšo go ditiragalo tša lefase.
Khomotšo go badumedi ke gore Jesu Kriste o a phela. Ke Modimo yo a phelago le mmuši wa legohle. Diteng tša Kutollo ga se palo ya diprofeto tša dilo tše di tlago direga nakong e tlago. E reretšwe kereke ya dinako ka moka. Modimo ka noši o tutuetša kereke ya gagwe – bahlanka ba gagwe – ka go bula se sengwe sa legodimong lefaseng go rena. Barongwa gantši ke batseta ba Modimo ka pukung ye. Se se gatelela gore ke molaetša wo o botegago.
Ga go na taba gore Johanese e be e le mang. O emela kereke bjalo ka sedirišwa se Modimo a fihlišago molaetša wa gagwe. Modimo o bolela le rena ka batho ba ba tlwaelegilego gomme molaetša wa gagwe ga se selo se re ka se boifago. Ge e le gabotse o re dira gore re thabe. Ka dinako tše dingwe re a dikadika go bala puku ya Kutollo ka gobane e tletše ka tshwantšhišo le diswantšho. Le ge go le bjalo, ga re a swanela go boifa go e bala. Puku e reretšwe go re kgothatša. Dinako tša bofelo gape ga se selo se kereke ya Modimo e swanetšego go se boifa. Ga re a swanela go phela ka poifo ya go boa ga Jesu. Ke selo se kereke ya gagwe e ka se letelago. Go moloko o mongwe le o mongwe, nako ye re phelago mo go yona ke nako ya go dira sephetho.
Nagana ka:
- 1.Ke dipoifo dife tšeo batho ba phelago ka tšona lehono?
- 2.Modimo o hlohleletša bjang kereke ya gagwe?
- 3.Leboga Modimo bjale gore o karolo ya kereke ya gagwe.
4. Kgopela Modimo a go lokolle go dipoifo dife goba dife tše di ka bago di le ka pelong ya gago.
