Mathomo a maswa – Letšatši la 13

Baprofesa ba babedi ba Amerika, Gary Hamel le CK Prahalad, ba dirile maitekelo moo ba beilego ditšhwene tše nne ka gare ga serobe, gomme ba tsema phoulo bogareng ba serobe. Ntlhoreng ya phoulo, ba beile dibanana tšeo di bego di lekeletše go tloga hlakeng.

 Ge ditšhwene di tsena ka serobong, ya pele e bone dibanana gomme ya thoma go namela phoulo go di fihlelela. Gomme, ge e le kgauswi le go tšea banana, ya welwa ke pakete ya meetse a go tonya, yeo e dirilego gore e fologe phoulo. Ya bobedi, ya boraro le ya bone di latetše tsela ya go swana. Mafelelong, ditšhwene ka moka tše nne di dutše fase khoneng ya serobe di gakanegile, mola dibanana di sa lekeletše hlakeng.

Baprofesa ba ntšha tšhwene e tee gomme ba lokela e mpsha. Tšhwene e mpsha e bone dibanana e sa tsena ka serobeng gomme ya re go tsena ya thoma go namela phoulo. Ge tšela tše dingwe tše tharo di bona leano la tšhwene e mpsha, di kitimitše go yona gomme tša e fološa phoulong go thibela gore e se itemogele kotsi ye di itemogetšego yona. Morago ga go leka makga a mmalwa, e mpsha (le ge e be e sa kwešiše gore ke ka lebaka la eng) ya emiša go leka go namela phoulo go fihlelela dibanana.

Ka e tee ka e tee, baprofesa ba ntšhitše ditšhwene tšela tša pele tše nne gomme ba lokela tše mpsha, gomme mokgwa wa ipoeletša. Mafelelong, go loketšwe ditšhwene tše nne tše mpsha ka serobeng tšeo di sa namelago phoulo pele, eupša tšeo di bego di boifa kudu go dira seo – le ge pakete ya meetse a go tonya e be e tlošitšwe ka serobeng.

Bophelong, gantši re na le go ba bjalo ka ditšhwene tše ge re dumelela dipoifo tša rena goba tša batho ba bangwe tša maitemogelo a mabe a nako ya go feta, go re utswetša go latela ditoro tša rena le go ba batho ba bakaonekaone ba Modimo a nyakago gore re be bona.

Theeletša gape mantšu go Jeremia 29:11: “Ke nna fela ke tsebago merero ye ke le reretšego yona, merero ya katlego, e sego ya tahlego, merero ya bokamoso bjo bo holofetšago.”

Ke eng magomo bophelong bja gago? Naa o a lemoga gore Modimo o na le maano a gore o atlege? A re kgopele Yena go re hlahla ka Moya wa gagwe wo Mokgethwa, go lebelela go feta maitemogelo a mabe le go batamela go ba kgato e tee go ditoro tša rena. Gopola, dibanana di sa lekeletše hlakeng gomme ke wena fela yo a ka namelago go di tšea! Modimo a go šegofatše.