Mathomo a maswa – Letšatši la 11

Go bana ba bangwe ba bannyane, go kgahlwa ke mogale wa bagale yo e sego wa nnete, Superman, ke ga sehla fela. Le ge go le bjalo, ga go a ba bjalo ka sehlami, Herbert Chavez, go tšwa Philippines. E sa le go tloga mola a bonago filimi ya Superman ka bo-1980, moanegwathwadi e le Christopher Reeve, Herbert a thoma go kgoboketša dilo tša segopotšo tše mabapi le moanegwathwadi yo.

Lerato la gagwe le go kgahlwa ke Superman le ile go boemo bja go latela ge Herbert a thoma go dira opareišene ye e tseneletšego ya phetošo ya mmele (go akaretša go ripa nko ya gagwe le dithama, le go hlabja tšhwana go tagafatša letlalo la gagwe) gore a swane le Reeve. O hlabile gape le ditšhwana tša silikone go kotofatša dipounama tša gagwe le go kotofatša dirope gore a lebege a na le digoba.

Herbert, sehlami sa diroko go tšwa Toropong ya Calamba kua Philippines, o itiretše sutu ya Superman yeo a e aparago ge a sepela ka toropong. Baagišani ba gagwe ba rile o be a sa ba tshwenye, eupša go e na le moo, o hlodile monyetla o mobotse go bona go ka ruta bana ba bona gore ba se leke go ba motho yo mongwe, eupša go ba ba moswananoši.

Kanegelo ye e ka kwagala e le bošilo, eupša ke makga a makae wena (mohlomongwe ka go tse tsebe) o ipapetša le motho yo mongwe – yo e lego yo mobotse go feta wena, o na le tšhelete e ntši go feta wena, yo bana ba gagwe ba šomago gabotse sekolong goba dipapading goba yo a bonalago a tumme tikologong ya mošomo go feta wena? Ke makga a makae o tlogela go ba wa moswananoši, ka go leka go swana kudu le motho “yola”?

Theeletša gape mantšu go Pesalome 139:16-18: “O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona. Aowii, Modimo, tše o di naganago nna di a mpalela; ga se ka bontši! Ge nka re ke a di bala, di feta dithorwana tša lešabašaba. Ge ke fetša, ke tla ikhwetša ke sa na le wena.”

Ge re lahlegelwa ke go ba bamoswananoši, ka go leka go ba motho yo mongwe, re tloga go leano la moswananoši la maphelo a rena. Ka gona, pele o inyatša ge o kopana le mogwera yo mobotse goba wa go huma, mošomi-gotee wa gago wa go tuma goba balekani bao bana ba bona ba hlalefilego, ba go kgona dipapadi, ikgopotše gore ba ka fihla magomong a lefase, eupša ba ka se be le bokgoni bja moswananoši bjo Modimo a go filego bjona ka go lebanya, gore o dire phapano lefaseng.

Ka gona, diriša monyetla o mongwe le o mongwe lehono – le letšatši le lengwe le le lengwe la ngwaga – go dira gore Modimo a be motlotlo ka wena. Gopola, go nyaka go ba motho yo mongwe ga go kgahliše go swana le go ba wena wa moswananoši! Modimo a go šegofatše.