Mathomo a maswa – Letšatši la 10

[Bokamorago: Ke rata go aba maitemogelo a babadi ba babedi bao ba pakago gore ga go se se palelago Modimo.]

Mmadi wa 1, Marinda: “Mengwaga e fitilego ke šometše khamphani ye e bego e rekiša dithaele. Ka nako yeo, o tee wa bareki ba rena o rekile dithaele tša ntlo ya gagwe ya disekwere-metara tše 100. A otara gape dithaele tše oketšegilego tša disekwere-metara tše 40 gomme a re o tla di tšea morago. Ka lokela otara ya gagwe sestemong.

Moreki a boa morago ga dibeke, eupša dithaele tša gagwe di be di rekišitšwe. Molaodi wa rena, ka go se tsebe, o khantshetše otara gomme a rekišetša moreki yo mongwe dithaele. Moreki o be a befetšwe kudu. Diphapoši ka moka ntlong ya gagwe di be di kgokagane gomme, ka go realo, obe a ka se šomiše dithaele tše dingwe legaeng la gagwe. O re file dibeke tše pedi go hwetša dithaele go thibela magato a semolao go tšwa go yena.

Re founetše moabi yo mongwe le yo mongwe ka Afrika Borwa le mošamawatle, eupša ba be ba se na le dithaele. Ka tlalelo, ka khunama pele ga Modimo. Ka tshepha Yena ka mo go feletšego ka katlego.

Ka morago ga beke, moabi a re founela re sa letela a re botša ka moagi yo a gomišitšego disekwere-metara tše 50 tša mohuta wa dithaele tše re bego re di nyaka, ka ge moreki a fetotše mogopolo wa gagwe gomme a dira sephetho sa go šomiša dithaele tše dingwe. Modimo ka maatla a a phagametšego tlhago a tsenelela a re thuša. Tlhompho ka moka go Yena!”

Mmadi wa 2, Amanda: “Ke na le mpšanyana e nnyane e botse ya go tšwa Scotland, Vicky. Ka ge ke dula ke le tee, dimpša tša ka di bjalo ka bana go nna. Ge ke fihla gae thapameng e nngwe gomme Vicky e se na le modiši wa ka wa Majaremane go ntumediša keiting, ka gonona gore se sengwe ga se gabotse. Le semeetseng ka thoma go e nyakela. Yo mongwe wa baagišani a re o e bone metsotso e mehlano ya go feta, e rakediša monamedi wa paesekela mokgotheng.

Ka mahlo a bego a tletše megokgo, ke rapetše ge ke sepela mekgotheng ya tikologo ya mo ke dulago gona, ke botšiša batho ka moka ge e ba ga ba e bona. Bošegong bjoo, pele ke robala, ke badile mantšu a Modimo go Jesaya 49:23: “Yo a botilego go thušwa ke nna a ka se lewe ke dihlong.”
Mesong e latelago, ke kopane le mošomi-gotee yo a mpotšišitšego pejana bekeng yeo gore ke e hweditše kae mpšanyana ya ka ya Scotland, ka ge bagwera ba gagwe ba nyaka go e reka le bona. Ke mmoditše gore Vicky e timetše. Mošomi-gotee wa ka o be a maketše ge a bolela gore o etetše mogwera wa gagwe bošego bja go feta gomme a mmotša ka mpšanyana ya Scotland ye e bego e kitima mekgotheng pejana letšatšing leo. Le semeetseng ra founa gomme ra hwetša gore motho yo mongwe yo a dulago dintlo tše pedi go ya bona o be a na le Vicky, tikologong ye ke dulago go yona! Ra tsena koloing gomme ra otlela go ya atereseng yeo, moo re hweditšego mpša e phela le go phela gabotse! Ke tumiša Modimo ka tlhahlo ya Gagwe!”

Go Jeremia 32:27 Modimo o re, “Ke nna Morena, Modimo wa batho ka moka. Kgane go na le se se ntšhitago?” Gomme go Mateu 19:26 re bala gore: “Jesu a ba lebelela, a ba fetola a re: ‘Mo go batho taba ye ga e kgonege, eupša go Modimo tšohle di a kgonega.’ ”

Ke eng seo se lebelegago bjalo ka thaba ye e go emego tseleng? Naa o tla kgopela Modimo go go fa katlego? Gopola, bao ba tshephago yena ba ka se lewe ke dihlong. Modimo a go šegofatše!