Lokologa – Letšatši la 19

Morago bjale, nakong ya poledišano, mosadi o dumetše go nna gore ka lebaka la lenaneo la gagwe la bjale le le pitlaganego la mošomo, o palela ke go ba le nako le Modimo kgafetšakgafetša. Ka ntle le mošomo wa gagwe, ke mosadi yo a nyetšwego gomme o swanetše go hlokomela bana. Ka lebaka la molato wo, o thomile go se sa ba le nako le Modimo le ge a na le nako, ka ge a ikwa gampe mabapi le yena. Naa o swana le yena? Ke eng tlwaetšo ya gago mabapi le dinako tša setu le Modimo?

Lenaba le lemoga maatla a badumedi ge ba e ba le nako le Modimo. Ka gona, o leka go thibela seo ka go dira gore re swarege kudu. Boikwelo bja molato bo ka mpefala ge re na le kgopolo e fošagetšego ya gore nako le Modimo e swanetše e lekanyetšwe go ba iri pele re eya mošomong goba iri pele re robala.

Nnete ke gore, Modimo o gohle gomme re ka mo kgopela go ba karolo ya boemo bjo bongwe le bjo bongwe bjo re ka lebeletšanago le bjona nakong ya letšatši la rena. Re dira bjang seo? Ge re hloka bohlale, kgaugelo goba bokgoni bja go hlama lefelong la mošomo, re ka bo kgopela. Ge re nyaka go bontšha lethabo le tebogo, re ka mo lebogela yona. Gomme ge go bonala eka bohloko le tobo di a re imela, re ka kgopela Modimo go re kgwatha le go re homotša, a le gare a re rola morwalo.

Go Pesalome 139:1-3 re bala gore: “Morena, o ntekotše mme o a ntseba. O tseba tšohle tše ke di dirago; o tseba tša pelo ya ka o le kgole. O laola mesepelo ya ka le marobalo a ka; ditsela tša ka o di tseba gabotse.” Go Baheberu 4:13 re bala gore: “Ga go sebopiwa se se širegelago Modimo; tšohle di a mo utologela tša ba pepeneneng. Ke yena yo re swanetšego go ikarabela go yena.” Gaešita le Jesu, go Mateu 28:20, ge a rotogela legodimong, o rile go barutiwa ba gagwe: “Tsebang gore ke tla ba le lena ka mehla go fihla mohla lefase le fela.”

Ka nnete, go bala Bibele le go ba le dinako tša setu le Modimo go bohlokwa kudu go godiša tumelo ya gago, eupša Modimo o lebelela maikemišetšo a dipelo tša rena gomme go na le kgaugelo dinakong tša ge re lebeletšane le dilo tša go fapanafapana ka nako e tee. Ge e le gabotse, re bala go Jakobose 4:8: “Batamelang Modimo, gomme le yena o tla le batamela.”

A re sepeleleng kgole le go ipona molato ga go se be le bohlatse wo lenaba le lekago go re rweša wona le, go e na le moo, go kgopela Modimo go ba le rena ka gare ga diofisi mafelong a mošomo moo diphetho di dirwago, moo re emago ge re hlwekiša magae a rena, moo re ikhutšago gona ge re fologile dipaesekela tša go namela dithaba thabeng goba gaešita re le gare re apeša ngwana mongato. O gohle gomme o nabela go ba le tswalano ye e phelago le yo mongwe le yo mongwe wa rena. Mo amogele ditseleng tša gago ka moka gomme o tla hlahla dikgato tša gago. Batamela Modimo gomme le yena o tla go batamela. Modimo a go šegofatše.