Lokologa – Letšatši la 18

Mo mengwageng, babadi ba mmalwa ba pakile ka gore ba itemogetše mehlolo. Mmadi, André Bruyns, yo a itemogetšego mohlolo bophelong bja gagwe, o nngwaletše emeile. Mo ke setsopolwa:

“Ke fihlile mošomong mosong wo ke nyamile kudu. Ke gola ka morokotšo gomme go fihla ga bjale (Hlakola 25), ga ke so rekiše selo, se se hlaloša gore nka se be le tšhelete ge kgwedi e fela. Se se mpefatšago seemo ke gore mosadi wa ka ga bjale ga a šome, gomme o ya go belega ngwana wa rena wa pele (morwa) e se kgale! Ke na le kgateletšego ya monagano.

Ke badile sengwalwa ka bokgoni bja Modimo go tloša thaba tseleng. Ka tšea sephetho, bjalo ka motho kanegelong, go kgopela Modimo mohlolo. Morago ga go mmotša sa mafahleng, ke ile ka thoma go mo tumiša ka kopelo ka botho bja gagwe.

Ka metsotso e lesome, ke amogetše mogala go tšwa go moreki a re ke mo tlišetše tše ke di rekišago ka Mošupologo goseng. Ka go makala, ka leboga Modimo. Ka metsotso e lesome, a tsenelela a dira gore kgwedi ya ka e atlege. Ga a tumišwe!”

André o nepile. Modimo a ka homotša ledimo lefe goba lefe ka metsotso e lesome. Ke eng boikarabelo bja gago ge ledimo leo le tšwela pele nako e telele go feta ka mo o bego o holofetše?

Habakuku le Jobo ba ba le kholofelo, ba tshepha Modimo ka dikatlego tša bona. Theeletša mantšu a Habakuku go Habakuku 3:17-18: “Le ge mego e ka se khukhuše, le merara ya se enywe, le ge puno ya mehlware e ka pala, le mašemo a se be le dijo, le ge mašaka a ka felelwa ke dihuswane, le meraka ya dikgomo ya se be le selo, nna ke tla no thaba ka thakgala, gobane Morena Modimo ke Mophološi wa ka.” Jobo le yena ga se a ka a furalela Modimo ka gare ga mathata bophelong bja gagwe. Ka lebaka la se, a bona Modimo. Theeletša mantšu a gagwe go Jobo 42:5: “Ke be ke kwele ka wena ka go anegelwa, eupša bjale ke iponetše wena ka a ka mahlo.”

Ke ofe mohlolo wo o o nyakago lehono? A re tumišeng Modimo, bjalo ka Habakuku le Jobo, ka gare ga ledimo. Se se re kgontšha go lebelela go feta ditlhohlo tša rena le go bona bogolo bja Modimo. Gape se hlola boemo moo Modimo a dirago mehlolo. Tšwela pele go tshepha Modimo. Tlhohlo ya gago ya bjale e ka dira gore o utolle Modimo lefsa – bjalo ka ge Jobo a dirile. Modimo a go šegofatše.