Lokologa – Letšatši la 20

Naa go bonala eka ditlhohlo bophelong bja gago di tšhošetša go go nola moko? Ke ruma lelokelelo le ka bopaki bjo bo kopana bja Dr Isak Burger, mopresidente wa AFM Church ka Afrika Borwa. Bopaki bjo bo ka hwetšwa gape ka pukung ya ka, God was dáár. A bo go gopotše gore Modimo o gona ka mehla!

Ka go nyama, Isak o dutše setulong ka phapošing ya go letela sepetlele. Kgateletšego ya monagano ya dibeke pele ga nakwana ye e be e tšhošetša go mo fenya – gomme go oketša go mathata a gagwe, o be a le morago ga nako ka metsotswana go tlo bona morwedi wa gagwe yo mogolo pele a ka išwa ka phapošing ya go buwela a yo dirwa opareišene ka ge a be a ekwa bohloko.

E be e le marega go lapa la Burger. Ka lebaka la go diega mo go bego go sa letelwa morago ga go rekišwa ga ntlo, ba itemogetše kgatelelo ya ditšhelete. Morwa wa Isak o kgaogile leoto morago ga kotsi e šoro ya sethuthuthu, morwedi wa gagwe o monnyane o hweditšwe a na le bolwetši bja go se tlwaelege gomme a išwa sepetlele, gomme ka morago ka mengwaga e tshela a nyetšwe, morwedi wa gagwe o mogolo mafelelong a ima. Le ge go le bjalo, ka lebaka la mathata a magolo, o ile a swanela ke go ya sepetlele gore ba ntšhe ngwana a na le dibeke tše 20 a imile. E ka ba e bile motlogolo wa pele wa Isak le mosadi wa gagwe, gomme opareišene e be e kweša bohloko go lapa ka moka.

Ka gobane mosadi wa Isak le mokgonyana wa bona be be ba se gona ka lebaka la kgwebo, Isak o itlhaganetše go tšwa boemafofane morago ga moletlo, gore a kgone go yo fihla sepetlele ka nako go yo thekga morwedi wa gagwe pele ga opareišene. Le ge go le bjalo, o be a šiilwe ke nako. Se a bego a ka se dira e be e le go kgopela mooki wa ka phapošing ya go buwela go botša morwedi wa gagwe gore: “Tatago o gona mo.”O tsebile gore bogona bja gagwe bo tla mo kgothatša.

Ka madimo ao a bego a tšutla ka lapeng la gagwe, Isak o dutše setulong ka phapošing ya go letela, a katana le maikutlo a gagwe. Tobo ya motlogolo wa gagwe wa pele, gammogo le mathata a mangwe ka moka, e be e bonala e le e kgolo kudu. Ka nako yeo, gateetee a itemogela mohebehebetšo go tšwa go Moya wo Mokgethwa: “Isak, Tatago le yena o gona mo.”

Pelo ya Isak ya fofafofa ka tsebo ya gore Modimo, Mohlodi le Tatago rena, o be a le gona ka phapošing ya go letela le yena, go mo homotša ka gare ga madimo a gagwe. Gomme dikgweding tša go latela, Modimo a homotša madimo a bona.

Bjalo ka badumedi, re na le go itemogela maemo ao a hlohlago ao re kopanago le wona. Le ge go le bjalo, re ka tseba gore Modimo o ka gare ga ledimo, a ikemišeditše go re homotša. Go Pesalome 34:18-20 re bala gore: “Morena o kgauswi le bao ba nolegilego moko; o phološa bao ba feletšwego ke tshepo.” Go Baheberu 13:5 Modimo o re: “Nka se tsoge ke le tlogetše, ebile nka se tsoge ke le lahlile.” Gomme go Pesalome 23:4 go ngwetšwe gore: “Le ge nka sepela molapong wo o šiišago, nka se boife selo, gobane wena, Morena, o na le nna.”

Ke dife ditlhohlo tše o lebeletšanego le tšona lehono? Gopola, Modimo o kguaswi le wena. A ke se tsoge a go tlogetše goba go go lahla gomme o ka tseba gore o tla go thuša. Modimo a go šegofatše.