Lokologa – Letšatši la 17

Naa e sa le wa ikhwetša morago bjale o le boemong mo o hlokago mohlolo? Modimo o sa dira mehlolo. Mo ke bopaki bja Iban Vermeulen go tšwa Stellenbosch:

“Dikudumela di be di thomile phatleng ya ka ge ke ekwa bohloko gape leotong la ka. Ke be ke patlame ke le noši mpeteng wa sepetlele. Mosadi wa ka o be a le gae le ngwana wa rena yo a sa tšogo belega gomme dingaka di lekile go emiša paketheria ya letlalo (cytotoxins) gore e se keke leetong la ka. Letlalo la potane ya ka le be le tšwela pele go foforega gomme leoto la ka e be e le le letala ka mmala mola ke ke be ke ekwa bohloko kudu.

Matšatši a mmalwa pele, ke ile ka yo nwa kofi le mogwera. Ke ile ka kwa ke longwa potaneng ya ka, eupša ka se šetše le semeetseng. Mathapameng ao, ke ile ka thoma go lwala gomme ka 20:00 bošegong bjoo ka wela fase ka letadi la ditikree Celcius tše 41. Ke ile ngakeng, eupša le ge a mphile dihlare, bohloko bja ka bja mpefala. Matšatši a mararo morago, ke išitšwe sepetlele.

Dingaka mafelelong di hweditše gore segokgo se ntomme potaneng ya ka. Mpholo o bakile twatši letlalong la ka ye e jilego llaga ya bobedi le ya boraro ya letlalo la ka. Le ge ba mphile sehlare sa go bolaya ditwatši se maatla go thibela paketheria, boemo bja ka bja mpefala. Leoto la ka la ba le letalalerata. Letlalo la tšwela pele go foforega gomme gwa ba le polelo ya gore dingaka di tla swanela ke go le ripa go emiša tshenyo ya mpholo.

Ke le gare ke lla, ke tswaletše mahlo a ka ke patlame mpeteng wa sepetlele gomme ka llela Modimo gore a dire mohlolo. Ke tsebile gore o tla mphodiša. Ka letša kopelo, ‘God is Able’ ke e bušeletša, ke le gare ke leboga Modimo gore o laola bophelo bja ka.

Mosong wa go latela, dingaka di be di maketše. Go ruruga go go khubedu leotong go be go thomile go phohla. Ba be ba sa kwešiše gore ke ka lebaka la eng dibolaya-ditwatši bjale di šoma. Go ntšere dibeke gore ke fole ka mo go feletšego.

Morago ga ge ke lokolotšwe sepetlele, ke eteše ngaka ye e tsebago kudu ka go longwa ke segokgo. A lebelela tekanyo ya diphilisi tša go lwantšha paketheria tše ke filwego sepetlele gomme, le semeetseng, a re di ka ba di sa fodiša paketheria ya letlalo ka ge e be e se dihlare tša maleba. Ka nako yeo, ke tsebile gore Modimo o be a na le nna ka phapošing ya sepetlele. A bona tlalelo ya ka, a nkgwatha gomme a mphodiša. Ke mo fa letago ka moka ka mohlolo wa ka!”

Iban o nepile. Ga go se se palelago Modimo. Go Pesalome 77:14 re bala gore: “Ke wena Modimo, Modiramehlolo; o bontšhitše baditšhaba maatla a gago.” Modimo o gona ge re thoma go mo rapela. Go Pesalome 22:3 re bala gore: “… etšwe o dutše sa borena o le Mokgethwa, moo go kwalago direto tša Israele.” Ga gona magomo go se Modimo a kago se dira ge re mo tshepha ka mo go feletšego. Go Baefeso 3:20-21 re bala gore: “Yena a kgonago go dira tše di fetago kudu tše re kago di kgopela goba ra di nagana … a a tumišwe ke ba meloko yohle ka kerekeng le go Kriste Jesu go ya go ile! Amene.”

O hloka mohlolo ofe lehono? Tsošološo ya lenyalo, phodišo, mošomo, kabo ya ditšhelete ge kgwedi e fela? Naa o dumelela pelaelo go go nola moko goba o tumiša Modimo bjalo ka Iban, gape le Paulose le Silase, ba le gare ba tswaleletšwe ka kgolegong? Gopola, katlego ya gago e ka ba e hloka thapelo e tee fela. Modimo a go šegofatše.