Lokologa – Letšatši la 16

Ge o ka ela lethabo la gago le khutšo sekaleng sa dintlha tše lesome, o ka ipha nomoro efe?

Lenaba le hlasela lethabo la rena le khutšo ka gobane o a tseba gore ka ntle le tšona, ga re iketle le go se be le maatla. Go Nehemia 8:10b re bala gore: “Go thabela Morena go tla le šireletša!” Ka ntle le lethabo, ga re be le maatla. Go Pesalome 34:14 re bala gore: “Le tlogele tše mpe le dire tše dibotse; le katanele khutšo mme le e phegelele.” Ka ntle le khutšo re katanela go dira diphetho tša maleba goba gaešita le go kwa lentšu la Modimo, ka gobane ka mehla re ba le boikwelo bja gore go na le selo se se re šetšego morago.

Lenaba le utswa bjang lethabo le khutšo ya rena? Nagana ka fao o ikwago ka gona ge yo mongwe lefelong la gago la mošomo a go swara gampe goba o eba motšwasehlabelo wa lesebo. Gantši, boikarabelo bja rena bja pele ke go itefeletša go bontšha gore ga re na molato le go hlatswa leina la gago le motho yo a go kwišitšego bohloko. Morago ga fao, re nagana ka mehla ka ditiro tše di sa lokago kgahlanong le rena mola re wela ka molabeng wa lenaba, re lahlegelwa ke lethabo le khutšo ya rena.

Ka letšatši le lengwe, ke ikhweditše ke le ka gare ga boemo bjo bo boletšwego ka godimo. Ke maketše le go kwa bohloko ka tshwayo ya go hloka maikwelo, ya maaka ye e dirilwego kgahlanong le nna, ke be ke ikemišeditše go itefeletša. Ka nako yeo, gateetee ka itemogela lentšu la Moya wo Mokgethwa ka gare ga ka: “Benescke, na o tlo leka go lwa ntwa ye ka bowena, mola o lahlegelwa ke lethabo la gago le khutšo, goba o tlo tshepha nna go lwa legatong la gago?” Mantšu a a dirile gore ke se tšwele pele, mola ke lemoga gore nka se dire selo ka ntle le Modimo.

Na o ikhwetša boemong mo o nyakago go lweša bobe ka bobe, ka lebaka la tiro e mpe goba kanegelo kgahlanong le wena? Mohlomongwe e bile nakong ya tirišano ya kgwebo, lefelong la mošomo goba gaešita leloko la lapa goba mogwera wa kgauswi yo a go kwešitšego bohloko. Naa o tlo wela molabeng wa lenaba ka go lwa ka maatla a gago (mola o lahlegelwa ke lethabo la gago le khutšo) goba o tlo tshepha Modimo go lwa legatong la gago?

Modimo ke moahlodi yo a lokilego. Go Pesalome 9:4 re bala gore: “O šeditše gore ke direlwe ka toka tshekong; o dutše setulong sa gago sa kahlolo, o le Moahlodi wa go se kgethollo.” Go Jesaya 54:18 re bala gore: “Eupša wena ga go sebetša se o tlago hlaselwa ka sona sa go gobatša. Bohle bao ba go pharago ka molato tshekong o tla ba bontšha gore ke bona ba nago le molato.” Gomme go Jesaya 5:16 go ngwetšwe: “Morena Ramaatlaohle o laetša bogolo bja gagwe ka go dira toka, gomme o bontšha gore ke yo mokgethwa ka go ahlola ka tshwanelo.”

Naa lethabo le khutšo ya gago di lekanyetšwa kae sekaleng lehono? A re lekeng go di šireletša mola re retologela go Modimo, moahlodi wa go loka, re tshepha yena go šireletša leina la rena, a bontšha go se be le molato ga rena le go ahlola ka toka. Ge e le gabotse, o holofeditše gore ga go sebetša se o tlago hlaselwa ka sona sa go gobatša – gomme seo ke kholofetšo! Modimo a go šegofatše.