Khomotšo go tšwa Lentšung – Letšatši 26

₁Ke tšhabela go wena, Morena,

ke se tsoge ke jelwe ke dihlong.

O ntlhakodiše ka maatla a gago a go phološa.

₂Ntlhwaele tsebe!

Ntlhakodiše ka pela!

Eba mošireletši wa ka yo ke tšhabelago go yena,

le sebo sa go ntšhireletša.

₃O mošireletši wa ka le sebo sa ka.

Ka ge o ntlhokomela,

o tla ntlhahla wa nketetša.

₄Ntanyolle sefung se ba ntheilego ka sona.

gobane ke wena setšhabelo sa ka.

₅Ke gafela moya wa ka diatleng tša gago,

gobane o tla mphološa, Morena.

wena Modimo yo a botegago.

₁₅Bophelo bja ka bo laolwa ke wena;

ntlhakodiše diatleng tša manaba a ka,

le go tša bantlhomari.

₁Ke be ke letile Morena ka tlhologelo,

mme a ntlhwaela tsebe,

a nkwa ge ke mo llela.

₂A nntšha moleteng wa tahlego,

moo tebetebeng ya leraga,

a mpea sebong,

a ntshepediša mo go omilego.

₃A mpha kopelo ye mpsha,

sereto sa Modimo wa rena.

Ba bantši ba tla re go kwa kopelo ya ka ba gakgamala, ba tshepha Morena.

₁₂Ke tla phetha tše ke go anetšego tšona, Modimo;

ke tla go neela sehlabelo sa tebogo,

₁₃ka gobane o ntlhakodišitše lehung,

wa nthekga gore ke se thedimoge,

ke phele mo lefaseng ke bonegetšwe ke wena.

₁Morena, ntlhwaele tsebe o nkarabe,

gobane ke mohlaki ebile ke mohloki.

₂Ntlhakodiše lehung,

gobane ke a go botegela.

₃Mphološe, nna,

mohlanka wa gago yo ke go botilego.

O Modimo wa ka,

ntšhokele, hle, Mong wa ka,

gobane letšatši lohle ke a go llela.

₄Nthabiše, nna, mohlanka wa gago,

gobane ke go hlolosetše kudu,

Mong wa ka.

₅Wena, Mong wa ka,

o yo botho, o wa go swarela;

bohle ba ba go rapelago o ba rata kudu

ka leratorato.

₆Hle, Morena,

ntheeletše ge ke go rapela;

nkele hloko ge ke go llela.

₇Ge ke le mathateng ke llela wena,

ka gobane o a ntheeletša.

₈Modimo, moswananago ga a gona,

Mong wa ka,

le wa go dira tše di dirwago ke wena ga a gona.

₉Ditšhaba tšohle, dihlolwakewena,

di tla tla tša go khunamela,

tša go hlompha, Mong wa ka.

₁₀Gobane o senatla, Ramehlolo;

ke wena fela o lego Modimo.

₁₁Morena, nthute tše o nyakago ke di dira,

gore ke phele ka nnete ya gago.

Ntlhahle gore ke go boife ka pelo ka moka.

₁₂Ke tla go tumiša,

wena Modimo, Mong wa ka,

ka pelo ya ka yohle,

ka go hlompha go ya go ile,

₁₃gobane leratorato le o nthatago ka lona ke le legolo,

mo o bilego o ntlhakodiša sekoting sa bodulabahu.

₁₄Modimo, diganka di ntsogetše maatla;

ke tsongwa ke lekoko la dikgowa,

batho ba ba sa išego felo ka wena.

₁₅Fela, Mong wa ka,

o Modimo wa lerato le lešoko,

Rapelotelele, Ralerato le Rapotego.

₁₆Retologela go nna o nkgaugele,

o ntiiše, nna, mohlanka wa gago;

o mphološe,

ka gobane ke go direla boka mma mola a be a go direla.

₁₇Mpontšhe sešupo sa botho bja gago;

bantlhoi ba inyatše ge ba bona gore wena, Morena,

o nthušitše, o nkhomoditše.

₁Ke a go tumiša, Morena,

gobane o mphološitše lehung,

wa se dumelele manaba a ka go ntshega.

₂Ke go lletše,

Morena Modimo wa ka,

mme wa mphodiša bolwetšing.

₃O nkgomišitše ke eya bodulabahu, Morena.

Ke be ke le gare ga bao ba theogelago go baithobaledi,

eupša wena wa nntšha.

₄Opelelang Morena ditumišo,

lena babotegi ba gagwe!

Tumišang yena Mokgethwa!

₅Bogale bja gagwe ke bja lebakanyana fela,

botho bja gagwe bjona ke bja bophelo ka moka.

Le ge mantšiboa motho a ka robala a lla,

mosong o tsoga a thabile.

₆Mola ke sa iketlile ke ile ka ipotša ka re:

“Nka se tsoge ke tshwentšwe ke selo.”

₇Ka botho bja gago, Morena,

o ile wa ntiiša boka thaba;

fela ka morago wa tla wa mphuralela,

mme ka boifa.

₈Ke ile ka go bitša, Morena;

ke ile ka go rapela ka re:

₉“Lehu la ka le tla go hola ka eng?

Ke ra ge nka ikela bodulabahu?

Kgane bahu ba kgona go go reta?

A ba ka bega potego ya gago?

₁₀Nkwe, Morena, gomme o nkgaugele!

Nthuše, hle, Morena!”

₁₁Sello sa ka o se fetošitše mogobelo;

o nkapotše diaparo tša go ilela,

wa nkapeša lethabo,

₁₂gore ke go opelele ditumišo ke sa homole.

Morena Modimo wa ka,

ke tla go reta go iša go sa felego.