Khomotšo go tšwa Lentšung – Letšatši 21

₉Ntšhokele, Morena,

gobane ke mo tlalelong.

Mahlo a ka a gohlometše ka lebaka la sello;

ke lapile mmele le moya.

₁₀Mahloko a mphokoleditše bophelo,

mefegelo e nthipetše mengwaga.

Ke fokodišitšwe ke mohlako,

le marapo a ka a a opa.

₁₁Manaba a ka ka moka a a nnyatša,

gagolo ba e lego baagišani ba ka;

ba ba ntsebago ba a mpoifa;

ge ba mpona mekgotheng,

ba a ntšhaba.

₁₂Bohle ba itebadišitše nna mo nkego ke hwile;

ke bjalo ka selotsoko se se lahlilwego.

₂₂Ke be ke tšhogile ke re o nthakile pele ga gago.

Eupša o kwele sello sa ka mola ke go llela ke nyaka thušo.

₅Dišo tša ka di a nkga,

di dutla boladu ka lebaka la botlaela bja ka.

₆Ke kudupane, ke kokoropane,

ke hlwa ke lla letšatši ka moka.

₇Ke tletše dišo gohle mmeleng;

mmele wa ka o a fiša ka letadi.

₈Ke feletšwe ke maatla,

ke nolegile moko,

ke tsetlišwa ke manyami.

₉Mong wa ka, o tseba tlhologelo tša ka,

o kwa metsetlo ya ka.

₁₀Pelo ya ka e thebatheba kudu,

ke feletšwe ke maatla,

le mahlo a ka a fifetše.

₂₁Se ntlogele, Morena,

se nkeme kgole, Modimo wa ka!

₂₂Itlhaganele o nthuše, Mong wa ka,

Mophološi wa ka!

₁Bjalo ka kgama ge e llela meetse a meela,

le nna ke llela go wena, Modimo.

₂Ke nyoretšwe Modimo,

Modimo yo a phelago;

ke tla ya neng go itlhagiša pele ga gagwe?

₃Bošego le mosegare ke a lla,

mme megokgo ke tšona dijo tša ka;

nako yohle manaba a ka a mpotšiša a re:

“O kae Modimo wa gago?”

₄Ke setlega pelo ge ke gopola tša mola ke sa fela ke eya ntlong ya Modimo le lešaba,

ke le eta pele;

re le lešaba la lethabo,

re opela re reta Modimo.

₅Wena pelo ya ka,

o reng o hlokofetše gakaaka?

O reng o ferekane?

Tshepha Modimo,

gobane ke tla buša ka mo tumiša,

yena Mophološi le Modimo wa ka.

₁Ka pelong ke rile:

“Ke tla itlhokomela maitshwarong,

ka se bolele se sebe;

nka se bolele selo ke na le yo kgopo.”

₂Ke ile ka homola ka re tuu,

ka se bolele selo,

eupša ya ba lefeela.

Tlaišego ya ka yona ya nkgolela.

₃Ka tlalelana ge ke ntše ke tsetla ka mefegelo,

ka ba ka šitwa go itshwara,

mme ka botšiša ka re:

₄“Morena, ntsebiše pheletšo ya ka,

le gore nako ye e ntšhaletšego ke ye kaakang.

Ntemoše bokopana bja matšatši a ka.”

₅O mpeetše bophelo bjo bokopana;

bophelo bja ka o bona e se selo.

Motho wa nama ke lefeelafeela. Sela

₆Bophelo bja motho bo bjalo ka moriti wo o fetago;

tše a itapišago ka tšona ke lefeela.

O ikgobelela mahumo, a sa tsebe moji.

₇Bjale nna ke sa lebeletšeng,

Mong wa ka?

Yo ke mo holofetšego ke wena.

₈Mphološe dikarogong tša ka ka moka.

O se lese ditlatla di nkwera.

₉Ke tla homola, nka se bolele selo,

gobane ke wena o ntirilego gore ke tlaišege ka mokgwa wo.

₁₀Se hlwe o ntlaiša.

Ke šetše ke hlagaditšwe ke mekeketo ya gago.

₁₁O kgalema motho ka go mo otlela bokgopo bja gagwe;

o fediša se a se ratago ya ba nke se lewa ke tšhwele.

Motho ke lefeelafeela. Sela

₁₂Ekwa thapelo ya ka, Morena;

ntheeletše ge ke go llela.

O se hlokomologe sello sa ka,

gobane ke mofaladi nageng ya gago,

ke mofeti bjalo ka borakgolokhukhu ka moka.

₁₃Tlogela go mpea leihlo gore ke iketle pele ke itshepelela, ka se sa ba gona.

₁Bjalo ka kgama ge e llela meetse a meela,

le nna ke llela go wena, Modimo.

₂Ke nyoretšwe Modimo,

Modimo yo a phelago;

ke tla ya neng go itlhagiša pele ga gagwe?

₃Bošego le mosegare ke a lla,

mme megokgo ke tšona dijo tša ka;

nako yohle manaba a ka a mpotšiša a re:

“O kae Modimo wa gago?”

₄Ke setlega pelo ge ke gopola tša mola ke sa fela ke eya ntlong ya Modimo le lešaba,

ke le eta pele;

re le lešaba la lethabo,

re opela re reta Modimo.

₅Wena pelo ya ka,

o reng o hlokofetše gakaaka?

O reng o ferekane?

Tshepha Modimo,

gobane ke tla buša ka mo tumiša,

yena Mophološi le Modimo wa ka.

₆Pelo ya ka e hlokofetše,

ka gona ke a go gopola, Morena,

ke le mošono wa Jordane,

thabeng ya Hermone le ya Mitsare,

₇moo methopo e bitšanago gona

ka medumo ya diphororo tša gago.

O ntlišeditše mahloko bjalo ka maphoto a meetse ge a pipa motho.

₈Mosegare Morena o tla nthata ka lerato la gagwe, kilaphetogo,

bošego ka mo opelela ke mo leboga;

ke tla rapela yena Modimo yo a mphedišago.

₉Go Modimo, montwedi, ke re:

“O reng o ntebetše?

Ke ka lebaka lang ke sa tlaišwa,

ke gateletšwe ke manaba?”

₁₀Mahlapa a bona a nkweša bohloko ge ba ntomela ba fela ba re:

“O kae Modimo wa gago?”

₁₁Wena pelo ya ka,

o reng o hlokofetše gakaaka?

O reng o ferekane?

Tshepha Modimo,

ka gobane ke tla buša ka mo tumiša,

yena Mophološi le Modimo wa ka.

₁Modimo, kahlolong mpege go se be le molato,

mme o nkemelele go ba ba sa go khunamelego;

ntlhakodiše go baaketši bao ba kgopo!

₂Gape setšhabelo sa ka ke wena;

bjale o reng o ntahlile?

Ke ka lebaka lang ke sa tlaišwa,

ke gateletšwe ke manaba?

₃Nthomele seetša sa gago le therešo ya gago,

di ntlhahle di mpušetše thabeng ya gago ye kgethwa,

bodulong bja gago.

₄E be gona ke batamelago

aletare ya gago, Modimo,

ke tle go wena o nthabišago kudu.

Ke letše sekgapa sa ka ke go opelele ditumišo,

wena Modimo, Modimo wa ka!

₅Wena pelo ya ka,

o reng o hlokofetše gakaaka?

O reng o ferekane?

Tshepha Modimo,

gobane ke tla buša ka mo tumiša,

yena Mophološi wa ka,

Modimo wa ka.

₁Modimo, ekwa thapelo ya ka,

o se ntlhokomologe ge ke go llela.

₂Ntheeletše, mme o nkarabe;

ke tsieditšwe ke mathata.

₃Ke gakantšhitšwe ke legoa la manaba a ka

le kgatelelo ya bakgopo;

ba nkgobelela dithogako,

ba nkgalefetše, ba ntlhoile.

₄Pelo ya ka e thebatheba kudu;

ke swerwe ke poifo ya lehu.

₅Ke tsenwe ke letšhogo,

ke a thothomela,

ke swere pelo ka seatla,

₆gomme ke re:

“Nke nkabe ke na le diphego boka leeba,

ka fofa ka ya go ikhutša.

₇Nkabe ke fofela kgole,

ka yo itulela lešokeng. Sela

₈Ke be ke tla ikhweletša boširelo ka bjako,

ka širela phefo ye e tšubutlago le ledimo.”