Khomotšo go tšwa Lentšung – Letšatši 17

₁Morena, lerato la gago, kilaphetogo, ke tla le opela go ya go ile;

ke tla begela batho potego ya gago ka mehla.

₂Ke rile:

“Lerato la gago ke la go ya go ile;

o hlomile potego ya gago leratadimeng.”

₁A ke rete Morena!

A ke tumiše leina la gagwe le lekgethwa ka pelo ya ka ka moka.

₂A ke rete Morena,

ke se lebale tše a ntirelago tšona:

₃O ntebalela makgopo a ka ka moka;

o mphodiša malwetši a ka ohle.

₄O ntlhakodiša lehung;

o a ntlhompha, a nthata, a ntšhokela.

₅Bophelong bja ka ka moka

o mpha tše botse ka bontši,

gore ke no fela ke tiile,

ke le yo mofsa bjalo ka ntšhu.

₆Morena o fa bagatelelwa ditshwanelo tša bona,

o ba ahlola ka toka.

₇O tsebišitše Moshe maikemišetšo a gagwe,

o laeditše Baisraele ditiro tša gagwe.

₈Morena o na le kgaugelo le lešoko;

ga a befelwe ka pela,

mme o tletše leratorato.

₉Ga a dule a kgalemela motho;

ga a befelwe go ya go ile.

₁₀Ga a re otle go ya ka moo re sentšego ka gona,

goba a itefeletša ka lebaka la dibe tša rena le makgopo a rena.

₁₁Bjalo ka ge legodimo le katologile lefase kudu,

ba ba mmoifago le bona o ba rata kudu.

₁₂Bjalo ka ge bohlabela bo tlogelane le bodikela,

le rena o re tlogelanya le dibe tša rena.

₁₃Morena o hlokomela bao ba mmoifago,

go swana le tatagobana ge a hlokomela bana ba gagwe.

₁₄O tseba se re bopilwego ka sona –

ga a lebale gore re lerole.

₁₅Motho o phela nako ye kopana go swana le bjang,

o bjalo ka letšoba la naga le le khukhušago.

₁₆Ge phefo ye e tšhumago e foka, le a hwa, la timelela.

_17-18Eupša bao ba boifago Morena

bona o ba rata go ya go ile,

mme o botegela meloko ya bao ba botegelago kgwerano ya gagwe,

gape ba phethago ditaelo tša gagwe ka potego ka go latelana ga meloko.

₁₉Morena o beile setulo sa gagwe sa bogoši legodimong;

ke kgoši ya tšohle.

₂₀Retang Morena,

lena barongwa ba gagwe,

lena bagale ba maatla,

ba le phethago ditaelo tša gagwe,

le theetšago se a se bolelago.

₂₁Retang Morena,

lena dibopiwa tšohle tša legodimo;

lena bahlanka ba gagwe ba le dirago thato ya gagwe!

₂₂Retang Morena,

lena dibopiwa tša gagwe ka moka gohle mo a bušago gona.

A ke rete Morena!

₁Wena Modimo wa ka, wena Kgoši,

a ke go tumiše,

ke go rete go ya go ile.

₂Ke tla go tumiša ka mehla;

ke tla go godiša go ya go ile.

₃Morena ke yo mogolo,

a a retwe gagolo;

bogolo bja gagwe ke phetatlhaologanyo.

₄Meloko ka go hlatlamana e tla reta mediro ya gagwe,

ya bega le ditiro tša gagwe tše maatla.

₅Ba tla anega letago la gago le bogoši bja gago,

le ditiro tša gago tše di makatšago.

₆Ba tla anega maatla a gago ao ka ona o dirago ditiro tša go gakgamatša,

gomme nna ke tla bega bogolo bja gago.

₇Ba tla tsebagatša botho bjo bogolo bja gago,

ba gobela go loka ga gago.

₈Morena o na le kgaugelo le lešoko;

ga a befelwe ka pela,

mme o tletše leratorato.

₉O loketše dihlolwa tša gagwe ka moka,

mme o di šokela tšohle.

₁₀Dihlolwa tša gago ka moka di tla go tumiša;

ba ba go botegelago le bona ba tla go reta.

₁₁Ba tla anega letago la gago le bogoši bja gago,

ba bega le maatla a gago,

₁₂gore bohle ba tsebe tiro tša gago tše maatla,

le letago la gago le bogoši bja gago.

₁₃Bogoši bja gago ke bja go ya go ile,

le mmušo wa gago ke wa go dulela ruri melokong ka moka.

Morena o botegela dikholofetšo tšohle tša gagwe,

le gona o na le botho go tšohle tše a di dirago.

₁₄Morena o thekga bohle ba ba wago;

o kgothatša bohle ba ba nyamilego.

₁₅Diphedi tšohle di go lebelela di holofetše,

gomme o di fa dijo lebakeng la gona.

₁₆O khuporolla seatla sa gago,

wa fa diphedi tšohle tše di di nyakago.

₁₇Morena o lokile go tšohle tše a di dirago;

o na le botho medirong ya gagwe ka moka.

₁₈Morena o kgauswi le bohle ba ba mo llelago,

ke ra ba ba mo llelago ka mmannete.

₁₉O phethagatša ditumo tša ba ba mmoifago;

ba ba mo llelago o a ba kwa mme a ba hlakodiša.

₂₀Morena o babalela bohle ba ba mo ratago;

bakgopo ka moka bona o a ba fediša.

₂₁Nna ke tla tumiša Morena;

batho bohle a ba mo tumiše go ya go ile,

ka ge e le yo mokgethwa.

₁Retang Morena!

A ke tumiše Morena!

₂Ke tla mo reta bophelong bja ka ka moka;

ge ke sa phela ke tla opelela Modimo wa ka ditumišo.

₃Le se ke la ikanya babuši,

batho ba nama,

ba go se kgone go phološa.

₄Motho wa nama ge a ehwa o boela mobung;

ke mohla merero ya gagwe e phuhlamago.

₅Go lehlogonolo

yo a thušwago ke Modimo wa Jakobo,

yo a botilego Morena Modimo wa gagwe,

₆yena yo a hlodilego legodimo le lefase le lewatle le tšohle tše di lego ka go ona.

Ka mehla o a botega.

₇Ba ba gateletšwego o ba dira ka toka,

ba ba swerwego ke tlala o ba fa dijo.

Morena o lokolla bagolegwa,

₈o budulla difofu,

o kgothatša ba ba nyamilego,

o rata baloki.

₉Morena o babalela bafaladi,

ke mmabaledi wa ditšhiwana le bahlologadi,

mola bakgopo bona a ba kgopamišetša ditsela.

₁₀Morena o tla buša go ya go ile;

Modimo wa gago, wena Sione,

o tla buša ka go sa felego.

Retang Morena!

₁Retang Morena!

Ke mo gobotse go opelela Modimo wa rena ditumišo;

go a kgahliša ebile go a swanela go mo reta.

₂Morena o tsošološa Jerusalema;

o kgoboketša mathopša a Israele.

₃O homotša ba ba nyamilego,

o ba kgothatša manyaming a bona.

₄O beile dinaledi ka palo ya tšona,

a thea ye nngwe le ye nngwe leina.

₅Mong wa rena ke yo mogolo,

yo maatlamaatla,

bohlale bja gagwe ga bo elwe.

₆Morena o babalela banyatšegi,

bakgopo bona o a ba kokobetša.

₇Opelelang Morena sefela sa tebogo,

le opelele Modimo wa rena le letša sekgapa.

₈O pipa leratadima ka maru,

o nešetša lefase pula,

o mediša bjang mebotong.

₉O fa diphoofolo dijo tša tšona,

le mafotwane a magokobu ge a lla.

₁₀Ga a iše felo ka maatla a pere,

le a mohlabani ga a mo kgahle;

₁₁o kgahlwa ke ba ba mmoifago,

ba ba botilego rato la gagwe, kilaphetogo.

₁₂Reta Morena, wena Jerusalema!

Tumiša Modimo wa gago, wena Sione!

₁₃Gobane ke yena a dudišago batho ba gagwe ka boiketlo;

ke yena a šegofatšago badudi ba gago.

₁₄Ke yena a tlišago khutšo nageng ya lena,

gape a le khorišago ka dijo tše bosebose.

₁₅O ntšha ditaelo tša gagwe lefaseng,

gomme di fihla ka pela.

₁₆O neša lehlwa la šweufala bjalo ka leokodi;

šobane o e gaša bjalo ka molora.

₁₇O neša sefako se sekoto;

botšididi bja sona bo ka kgotlelelwa ke mang?

₁₈A ntšha taelo, tšeo ka moka tša tologa;

a fokiša phefo, meetse a tšona a ela.

₁₉Tše a di laetšego o di tsebiša Bajakobo,

ee, bona Baisraele ditaelo le melao ya gagwe o ba begela tšona.

₂₀Ga go tšhaba se sengwe se a se diretšego bjalo,

gomme taelo tša gagwe bona ga ba di tsebe.

Retang Morena!