Khomotšo go tšwa Lentšung – Letšatši 18

₁Modimo wa ka, Modimo wa ka,

o ntlogeletšeng?

Ke golola ke nyaka thušo,

eupša o no fela o le kgole le nna.

₂Mosegare ke hlwa ke go llela,

Modimo wa ka,

eupša ga o nkarabe;

le bošego ke lala ke go llela,

eupša khomotšo ga ke e hwetše,

₄Borakgolokhukhu ba rena ba be ba go botile,

mme wena o ba hlakodiša.

₅Ba be ba go llela mme ba phološwa,

ba go botile mme ba sa swabišwe.

₂₄Ga a lahle motlaišegi,

ga a mo hlokomologe ditlaišegong tša gagwe.

Ga a mo furalele, fela ge a mo llela o a mo thuša.”

₁Ntlhakodiše, hle, Modimo,

gobane meetse a mpoa ka megolo.

₂Ke sobelela tebetebeng ya leraga,

gomme ke hloka mo ke gatago gona.

Ke ka gare ga bodiba,

gomme ke gogotšwe ke mafula.

₃Ke lapišitšwe ke go lla,

le lentšu le hwile;

mahlo a ka a fifaditšwe ke go letela wena,

Modimo wa ka.

₂₉Ge e le nna,

ke a tlaišega, ke bohlokong;

nke o mphološe mme o ntšhireletše, Modimo.

₃₀Ke tla tumiša Modimo ka kopelo;

ke tla mo reta ka go mo leboga.

₃₁Seo ke se se tlago mo kgahla go feta go mo neela sehlabelo sa poo,

powana ya dinaka le ngatha tša mapharo.

₃₂Baikokobetši ge ba di bona ba tla thaba;

lena ba go khunamela Modimo,

tiang maatla.

₃₃Morena o theeletša bahloki,

le batho ba gagwe ba ba lego kgolegong ga a ba nyatše.

₉Ntšhokele, Morena,

gobane ke mo tlalelong.

Mahlo a ka a gohlometše ka lebaka la sello;

ke lapile mmele le moya.

₁₀Mahloko a mphokoleditše bophelo,

mefegelo e nthipetše mengwaga.

Ke fokodišitšwe ke mohlako,

le marapo a ka a a opa.

₁₁Manaba a ka ka moka a a nnyatša,

gagolo ba e lego baagišani ba ka;

ba ba ntsebago ba a mpoifa;

ge ba mpona mekgotheng,

ba a ntšhaba.

₁₂Bohle ba itebadišitše nna mo nkego ke hwile;

ke bjalo ka selotsoko se se lahlilwego.

₁₃Ke kwa sehebehebe sa ba bantši ba ba ntikaneditšego mme se a ntšhoša.

Ba ntogela maano,

ba lakana go mpolaya.

₁Morena, ke go bitša ke le fasefase

sekoting sa dibe tša ka.

₂Ekwa sello sa ka, hle, Mong wa ka;

ntlhwaele tsebe ge ke go kgopela thušo!

₃Ge o ka be o eya le makgopo a rena, Morena,

ke mang yo a ka bego a ka phela, Mong wa ka?

₄Eupša o re swarela dibe,

gore re tle re go boife.

₅Ke dula ke letetše go thušwa ke Morena,

ke letetše ka mafolofolo,

ke emetše gore go phethege se a se boletšego.

₆Ke dula ke letetše Morena

go feta bahlapetši ba ba letago masa,

ee, bahlapetši ba ba letago masa.

₇Israele, holofela Morena,

gobane lerato la gagwe ga le fetoge,

gomme o dula a itokišeditše go phološa.

₈O tla phološa Baisraele makgopong a bona.