Kholofelo e mpsha – Letšatši la 6

Mosadi yo a ikokobeditšego o ile go moruti setšhabeng sa gabo. Ge moruti a dula fase go mo theetša, o rile: “Moruti, monna wa ka, bana le nna re dula ka phapošing ye nnyane gomme re pitlagane ka dinako ka moka. Ga ke sa kgona.” Moruti a dumela ka hlogo. “Reka dikgogo tše mmalwa,” a šišinya. Mosadi o mo lebeletše a sentše sefahlego. Naa seo se tla ba thuša bjang? Yena, le ge go le bjalo, a latela keletšo ya moruti.

Ka morago ga nako, mosadi a boela morago go moruti. Nakong ye, o be a befetše kudu: “Moruti, dikgogo di hlaba lešata go tloga mesong letšatši le letšatši! Bana ba a goeletša. Nna le monna wa ka ga re sa kgona. Naa o na le keletšo go rena?” Gape, moruti a dumela ka hlogo. “Reka pudi”. Nakong ye, mosadi a šošobantšha sefahlego le go feta. Naa pudi e tla ba thuša bjang? Le ge go le bjalo, ka go tlalela, mosadi a latela keletšo ya moruti.

Letšatši le le latelago, o boetše go moruti. “Moruti, lekgotla la gago le nyaka tše ntši go tšwa go nna. Ga ke yo mokgethwa ka mo go lekanego. Ke dire eng?” Nakong ye, moruti a myemyela gomme a eletša gore a rekiše pudi le dikgogo.

Ka Sabatha se se latelago, morago ga tirelo ya kereke, mosadi o ile go moruti ka myemyelo e kgolo, “Moruti, ke leboga keletšo ya gago e botse kudu! Ka ntle le pudi le dikgogo, bophelo bo bonala e le bjo bobotse. Re ipshina ka setu le sekgoba. Ga sanke gwa ba go go botse ka tsela ye!”

Naa mohlomongwe o ikhwetša o le boemong bjo bo swanago o ferekane le go se thabe bophelong bja gago? Naa o a ngongorega ka mehla ka bjona goba o lebelela dilo tše o kago di thabela? Ke hwetša go kgahliša ka fao re ngongoregago ka diiri tša mošomo, go fihlela re kopana le motho yo a sa šomego yo a nyakilego mošomo lebaka la ngwaga, ka ntle le katlego. Goba ka fao re ngongoregago ka boitshwaro bja molekani goba ngwana, go fihlela re bolela le mohlologadi goba mohlolo, goba motho yo a lahlegetšwego ke ngwana yo a mo hlologelago kudu. Re ngongorega ka ditšhubaba maotong a rena goba mekhaba, go fihlela re kopana le motho yo a se nago maoto goba yo mpa ya gago e tlošitšwego ka lebaka la bolwetši.

Ge re tsepelela go maemo a ferekanyago goba a sa thabišego maphelong a rena, re palela ke go bona dilo tše re kago di thabela. Go 1 Bathesalonika 5:18 re bala gore: … dilong ka moka sa lena e be go leboga, gobane tšeo ke tšona tše Modimo a di nyakago mo go lena ge le le ba Kriste Jesu. Gomme go Baefeso 5:19b-20: … le opelela Morena le mo tumiša ka dipelong tša lena. Ka ge le le ba Morena wa rena, Jesu Kriste, ka mehla le leboge Modimo, Tatagorena, ka lebaka la tšohle.

Boemo bjo bongwe le bjo bongwe bo ka re bopa le go hlama semelo sa rena. Re hloka go kgopela Modimo go re thuša go tsepamiša šedi ya rena dinakong tše boima. Ka gona, a re direng gore ngwaga wo e be ngwaga wo re mo kgopelago gore a re thuše go leboga maemong ka moka. Go ka se re thuše feela go ipshina ka bophelo kudu; re ka thoma go leboga ka dilo tše rena, mathomong, re bego re ngongorega ka tšona! Modimo a go šegofatše.