Kholofelo e mpsha – Letšatši la 2

2013 e bile ngwaga o boima go monamedi wa paesekele wa go tuma lefaseng, Lance Armstrong. Mafelelong o dumetše gore o šomišitše diokobatši nakong ya poledišano ya gagwe thelebišeneng le Oprah Winfrey.

E sa le go tloga ka nako ye Etšentshi ye e lego kgahlanong le tšhomišo ya Diokobatši ya U.S. e gatišitšego pego mabapi le maaka a Armstrong, o lahlegetšwe ke bathekgi ba gagwe ba bantši. O tšeetšwe gape difoka tša gagwe tše šupa tša Tour de France.

Ga re a swanela go ahlolana. Le ge go le bjalo, se ke hwetšago se kgahliša ke ka fao diphiri tše utilwego maphelong a rena di ka fetogago kgokomodumo, ka mehla di sa re nee khutšo. Di re tšeela lethabo le khutšo ya rena, le go dira gore re ntšhetše pefelo ya rena go bao re phelago le bona bao re swanetšego re ba rate kudu. Ge se se direga, lenaba o dula fase a myemyela, a tseba gore diphiri tše utilwego di re tswaleletše kgolegong, di re palediša go ipshina ka bophelo ka mo go feletšego.

Ke eng sephiri sa gago se o se utilego? Go ratana le motho yo mongwe ka ntle ga lenyalo la gago? Temalelo? Kwano ya boradia mošong? Naa o ntšhitše mpa? Naa o gobošitšwe ka thobalano goba o gobošwa ka yona ke motho yo mongwe? Naa o tshwenya ke kgokomodumo? Ke ka lebaka la eng o sa e bolaye ka go boledišana le Modimo ka sona?

Theeletša gape mantšu a go Mateu 10:26-28: “… gobane ga go se se bipilwego se se ka se kego sa bipollwa, le sephiri se se ka se kego sa tsebja ga se gona.” Gomme go Baheberu 4:13 re bala gore: Ga go sebopiwa se se širegelago Modimo; tšohle di a mo utologela tša ba pepeneneng. Ke yena yo re swanetšego go ikarabela go yena.

Modimo o bona le go tseba dilo ka moka. Kganyogo ya gagwe ke gore rena re tle go yena ka gobane ke seetša gomme go yena, ga gona leswiswi. Ke ka lebaka la eng o sa boledišane le yena ka diphiri tša gago? Ge ka nnete o fetoga le go tlogela dibe tša gago, o holofetša go di tloša bjalo ka ge bohlabela bo tlogelane le bodikela (Pesalome 103:12).

Ka dinako tše dingwe, ditlamorago tša go bolela nnete di ka bonala e le tše kgolo kudu. Modimo, le ge go le bjalo, o tla go maatlafatša go lebeletšana le dilo ka moka. Le ge ditlamorago e ka ba tše bohloko lebaka le le letelele, o tla go thuša, a go lokolla le go go thuša gore o tšwelele ka lehlakoreng le lengwe o fentše, ka kholofelo e mpsha pelong ya gago.

Se lete go fihlela go e ba morago ga nako. Go bokaone kudu gore diphiri tša gago di tšwelele nyanyeng lefaseng, go e na le gore di tšwelele o eme pele ga setulo sa bogoši sa Modimo, ga go bjalo? Tšea sephetho lehono gomme o tsebe gore Modimo a ka se tsoge a go tlogetše goba a go lahlile.