Kholofelo e mpsha – Letšatši la 1

Ke badile sengwalwa mabapi le thuto ya nyakišišo ka baphologi ba Polao e sehlogo ya Bajuda. Morero wa thuto e be e le go bontšha ge e ba go be go na le mabaka a swanago magareng ga sehlopha sa baphologi, ka ge batho ba bantši ba hlokafetše dikampeng. Dikhwetšo tša go kgahliša: batho ka moka ba ba phologilego ba bile le kholofelo. Ka dinako tše dingwe e be e le ka sebopego sa go ka tšhaba gomme ka tše dingwe, ka tsebo ya gore motho yo o mo ratago o be a sa phela le gore ba ka kgona go boelana. Ka nako ye batho dikampeng tša tlaišo ba lahlegela ke kholofelo, ba hlokafetše.

Ka kholofelo, re ka namela thaba ye teleletelele, ra lebeletšana le maemo a hlohlago kudu le go tšwelapele go gatela pele le ge re ikwa o ka re re ntšha moya wa rena wa mafelelo mebeleng ya rena. Ge re lahlegela ka kholofelo, maphelo a rena a šwalalana.

Naa ngwagola e bile ngwaga o bjang go wena? Ngwaga wo o tletšego ka diphihlelelo tše botse bjalo ka lenyalo, ngwana o moswa ka lapeng goba katlego ye kgale o bego o e letetše, nako e telele? Goba mohlomongwe ke ngwaga wo o nyakago go o lebala, ka gobane motho yo o mo ratago o hlokafetše, o hladilwe, o amogetše ditaba tše mpe goba mohlomongwe, o feditše matšatši a Krisemose o le tee.

Ge re gadima morago ngwagola, re gopotšwa ka dinako moo Modimo a re felego katlego ge go be go bonala go sa kgonege, eupša re gopotšwa gape ka bogona bja gagwe ka gare ga dinako tše boima. Go hlola monyetla wa go leboga Modimo, eupša gape go re nea kholofelo go ka tsena ngwageng o moswa ka ntle le poifo.

Kganyogo ya ka go wena ya ngwaga wo o moswa e tšwa go Baroma 12:12: Le thakgatšwe ke kholofelo ye le nago le yona; ge le na le matshwenyego le se a felele pelo; le dule le rapela. Gomme Baroma 15:13: Anke Modimo yo a le fago kholofelo a dire gore ka ge le mo dumetše, le be le lethabo le khutšo ka botlalo, gore kholofelo ya lena e fele e oketšwa ke Moya wo Mokgethwa ka maatla a wona.

A re hwetšeng kholofelo ya rena go Modimo go boemo bjo bongwe le bjo bongwe gomme a re tseneng ka ngwageng o moswa ka pelo ye e nago le tebelelo ya se Modimo a kago se dira maphelong le ka maphelo a rena. O ka se tsebe, lenyaga e ka ba ngwaga o mokaonekaone kudu! Modimo a go šegofatše.