Kholofelo e mpsha – Letšatši la 14

Sepela le nna morago nakong go ya ngwageng wa 1372 pele ga matswalo a Kriste (B.C). Baisraele ba dula mengwaga ye 50 nageng ye e holofeditšwego ya Kanana. Lehono ba bokane motseng wa Shekeme go moetapele wa bona, Joshua, wa mengwaga ye 110, yo a tlago bolela le bona ka Modimo.

Akanaya Joshua a ithekgile ka lepara la gagwe pele a thoma go bolela, moo a gopotšago Baisraele ka go botega ga Modimo: “Se ke se Morena, Modimo wa Israele, a se bolelago: ‘Kgalekgale borakgolokhukhu ba lena, go akaretšwa Terage, tatago Abrahama le Nahoro, ba be ba dula ka mošola wa Noka ya Yufratese, gomme ba khunamela medimo e mengwe. Eupša ke ntšhitše rakgolokhukhu wa lena, Abrahama, nageng ka mošola wa Yofratese gomme ka mo iša nageng ya Kanana. Ke mo fele ditlogolo tše ntši ka morwa wa gagwe Isaka. … Gomme ka romela Moshe le Arone, gomme ka baka mauba a šoro go Egepeta; gomme ka morago, ka le ntšha bjalo ka batho ba ba lokologilego.

‘Eupša ge borakgolokhukhu ba lena ba fihla Lewatleng la Mahlaka, Baegepeta ba ba rakediša ka makoloi a ntwa le banamedi ba wona. Ge borakgolokhukhu ba lena ba llela go Morena, ke bakile lewatle gore le ba khupetše, le ba nweletše. Ka mahlo a lena, le bone se ke se dirilego. Gomme, le phetše lešokeng mengwaga e mentši.

‘Ge le tshela Noka ya Jordane go ya Jeriko, banna ba Jeriko ba lwele le lena. … Eupša ke le neile phenyo go bona. Gomme ka romela poifo pele go lena go raka dikgoši tše pedi tša Baamore. E be e se marumo a lena le ditšhoša tše di le filego phenyo. Ke le neile naga ye le sa e šomelago le go le nea metse ye le sa e agago – metse ye ga bjale le dulago go yona …’”

Ke ka lebaka la eng Modimo a gopoditše Baisraele ka tša nakong e fetilego? O a tseba gore ge re lebelela morago gomme re gopola moo a re šireleditšego le go re nea dikatlego, go ba bonolo go rena go mo tshepha ka dikatlego nakong ya bjale. Le ge go le bjalo, Modimo ga a gapeletša Baisraele go mo khunamela, eupša o ba neeile kgetho – ba ka hlankela yena goba ba khunamela medingwana. Diphetho tše pedi, le ge go le bjalo, di nale ditlamorago.

Go Joshua 24:15, Joshua o ruma polelo ya gagwe ka sephetho sa gagwe le balapa la gagwe: “Ge le sa rate go mo direla, ikgetheleng lehono gore le tla direla mang: medimo ye borakgolokhukhu ba lena ba bego ba e direla kua Mesopotamia, goba medimo ya Baamore bao le dulago nageng ya bona bjale. Ge e le nna le lapa la ka, re tla direla Morena.”

Kua Shekeme, Baisraele (gaešita le bao ba bego ba khunamela medingwana), ba boetše go Modimo go yo khunamela yena. Ka go ikarabela go sephetho sa bona, Joshua o agile sehlwaseeme se segolo go ba gopotša ka sephetho sa bona. Go oketša moo, ka gobane ba tšere sephetho sa go khunamela Modimo, o ba šegofaditše le go ba šireletša.

Le wena lehono o boemong moo o kago tšea sephetho sa go ka bea Modimo pele ka lapeng la gago, lenyalong, mošomong le bophelong goba go itumelela go laolwa ke ditlwaedi tša lefase. Naa kgetho ya gago e tla ba efe? Gopola, sephetho sa gago se tla ba le seabe go wena le lapa la gago! Modimo a go šegofatše.