Kholofelo e mpsha (Karolo ya 2) – Letšatši la 6

Stefan e be e le mošemane wa mengwaga ye 15 yo a nago le bokgoni kudu go tšwa Bellville. Mengwaga ye mebedi, e bile yena fela sebapadi sa krikete go tšwa sekolong sa gagwe se phagamego yo a laleditšwego go diteko tša krikete tša ba mengwaga ya ka tlase ga 19 ke Profense ya Bodikela. Mathomong a ngwaga yena le mmagwe, ba lebeletšane le tlhohlo. Ditlabakelo tša gagwe tša go bapala e be e šetše e e ba tše nnyane ka ge a be a le yo motelele ka dimetara tše 1.9 gomme a apara saese 12 ya dieta, gomme ka lebaka la kgatello ya ditšhelete kua ga gabo, ba be ba palela ke go mo rekela ditlabakelo tše mpsha.

Ke ka lebaka leo mmagwe a rometše emeile go Radio Tygerberg go mo thuša. Go emeile ya gagwe, o akareditše bohlatse go tšwa go mohlahli wa gagwe a re botša ka talente ya gagwe ya go ikgetha, le gore o tšere sephetho sa go mo hlahla Stefan ka ntle le tefelo ka lebka la kgatello ya ditšhelete ka gae.

Mošomi-gotee wa ka o kgomilwe kudu ke emeile, gomme a tšea sephetho sa go rekela Stefan ditšhireletšo tša maoto le ditlafo. Ka morago ga matšatši a mabedi, re kgonne go leletša Stefan nakong ya lenaneo la rena la mesong moyeng ra mo makatša. O be a thabile kudu. Batheeletši ba rena ba mmalwa ba kgokagane le rena ka SMS ka studiong le semeetseng ka morago ga fao, ba re tsebiša gore le bona ba nyaka go neela ka tšhelete go ditlabakelo tše mpsha tša Stefan. Ka Lebohlano la beke yeo, re kgone go leletša Stefan gape ka ditaba tša gore re tla oketša ka dieta, ka bete, kefa le peke e mpsha ya go lokela diaparo tša go raloka krikete go lenaneo la gagwe la ditlabakelo.

Morago ga lenaneo lona Labohlano leo, ke amogetše mogala go tšwa go motheeletši yo a bitšwago Paul. O bapetše krikete nako e telele kua London. Go boeng ga gagwe ka Afrika Borwa, o tlogetše ditlabakelo tša gagwe kua boemafofaneng bja Heathrow gomme ditlabakelo tša gagwe ka moka tša krikete di šetše fao. Ka Afrika Borwa, o ile a swanela ke go reka ditlabakelo tše mpsha tša krikete ka ge a be a swanetše go bapala dipapadi tše mmalwa sephlopheng sa tikologo sa krikete. O šomišitše ditlabakelo tše diswa dipapading tše pedi goba tše tharo pele peke ya ditlabakelo e fihla go tšwa Engelane. Ke mengwaga e mmalwa ka morago bjale gomme ditlabakelo tša gagwe tše di nyakilego go e ba tše mpsha di sa le ka karatšheng ya gagwe. O nyaka go di neela Stefan. Se ke hweditšego se kgahliša ke gore ditlabakelo e bile tše Stefan a bego a di nyaka – le dieta tša saese 12! Paul o kgopetše go founela Stefan, gore a mo hlohleletsše goba a be moeletši go yena.

Mogala wa Paul o dirile gore ke lemoge gore re ka lebelela tiragalo ye ka tsela e tee go tše pedi: Re ka bona e no ba sewelo gore ditlabakelo e be e le saese ya maleba le gore o be a nyaka go thuša Stefan. Ka letsogong le lengwe, re ka e bona bjalo ka tsenelelo e kgethwa ya Modimo. Ya bobedi, motho a ka re go diega lebakanyana ga ditlabakelo tša Paul kua London ge e le gabotse e bile karolo ya leano la Modimo, ka gobane o tsebile gore Stefan o tla nyaka ditlabakelo tše mpsha le thekgo ya Paul nakong e bjalo ka ye.

Modimo o tseba bokamoso le go tseba se re se hlokago pele rena re ka tseba. Go Pesalome 139:7-12, Mopesalome o re gopotša nnete ya gore re ka se tšhabele bogona bja Modimo: Na nka go tšhabela kae? Ke kae mo nka go khutelago gona? Ge nka rotogela legodimong, ke yo hwetša o le gona; ge nka yo patlama bodulabahu, o tla be o le gona kua. Ge nka fofela kua bohlabatšatši, goba ka yo dula ka mafelelong a bodikelatšatši, le gona moo o tla ntlhahla ka seatla sa gago, o tla ntshwara ka seatla sa la go ja. Le ge nka re leswiswi le mpipe, goba seetša e be bošego go ntikologa, go wena leswiswi ga le fifale, le bošego bo taga bjalo ka mosegare – go wena leswiswi le swana le seetša. Gomme go temana ya 16, re gopotšwa gore Modimo o re tsebile pele re belega: O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona.

Ka gona, ge o ikwa o nolegile moko lehono, thoma go leboga Modimo go ba karolo ya maemo a gago a bjale le a nakong e tlago. Go se iketle ga gago ga bjale e ka ba se a se nyakago go bopa semelo sa gago le go šogana le dilo o sa bone, gore o kgone go itemogela katlego ya gago ka nako ya maleba! Tshepha yena, ka mehla o tseba bokaone. Modimo a go šegofatše.