Kholofelo e mpsha (Karolo ya 2) – Letšatši la 5

Babadi ba bantši ba mpotšišitše potšišo e swanago maka thapelo le nako ya setu le Modimo. Ka mo tlase, ke tše dingwe tša dipotšišo tše di tlwaelegilego:

POTŠIŠO YA 1: Ke ka lebaka la eng nako ya setu le Modimo e le bohlokwa? Naa ke efe tsela ye kaone ya go dira seo?
Go Jakobose 4:8 re bala gore: Batamelang Modimo, gomme le yena o tla le batamela. Nako ya setu ke monyetla wa go ka tseba yena bokaone kudu. Ke monyetla go rena e se fela ka go bolela le yena, eupša gape go rena ka go mo theeletša ge a bolela le rena ka Moya wa gagwe wo Mokgethwa.
Bjalo ka ge go se na tsela ya maleba goba ye e fošagetšego ya go aga segwera, ga gona tsela ya maleba goba ye e fošagetšego ya go fetša nako le Modimo, bjalo ka ge yo mongwe le yo mongwe wa rena e le wa moswananoši. Ka gona, re swanetše re katanele go aga tswalano ya moswananoši le Modimo.
Le ge go le bjalo, ke gabotse go ba le nako e itšego ye o tlago e fetša le Modimo letšatši le letšatši, ka ge e re thuša go rulaganya letšatši la rena, go e na le go swarega kudu moo re palelago ke go dira nako ya go ba le yena. Dithušo tše dingwe tša nako ye setu di akaretša Bibele, thulaganyo ya go bala Bibele, tšenale le selo bjalo ka Temana-ka-letšatši. Morago ga go bala sengwalwa sa elektroniki sa letšatši le letšatši, o ka naganišiša ka sona, o bale Bibele le go ngwala fase dipotšišo tša gago goba dintlha tša gago. Ge o thoma go fetša nako ya setu kgafetšakgafetša le Modimo, o ka makala ka fao a arabago dipotšišo tša gago gantši le go itšweletša go wena.

POTŠIŠO YA 2: Ke tseba bjang gore ke rapela ka tsela ya maleba? Naa ke swanetše go bolela le Modimo, Jesu goba Moya wo Mokgethwa?
Re rapela go Modimo ka leina la Jesu Kriste ka tlhahlo ya Moya wo Mokgethwa. Gopola, le ge go le bjalo, gore Modimo ga a theeletše fela mantšu a rena ge re rapela, eupša o lebelela gape boitshwaro bja dipelo tša rena. Ga go na mohola go leka go mo kgahliša ka go touta (Mateu 6:7). E ba wena.
Go Mateu 6:9-13, Jesu o nea barutiwa ba gagwe ditlhahlo tša go rapela: “Ka gona, ge le rapela le re: ‘Tatewešo wa magodimong, leina la gago a le kgethwe; mmušo wa gago a o tle; thato ya gago a e dirwe mo lefaseng bjalo ka ge e dirwa legodimong. O re fe lehono bogobe bja rena bja ka mehla. O re lebalele melato ya rena bjalo ka ge le rena re lebalela ba ba nago le melato go rena. O se re iše molekong, o upše o re phološe bobeng.’ ”

Ka gona, ge o ya go Modimo, bolela le yena ka pelo ya nnete ka gobane o a mo tshepha ka ditlhohlo bophelong bja gago. Yeo ke tswalano ya nnete.

POTŠIŠO YA 3: Ke tla tseba bjang gore ka nnete Modimo o kwa dithapelo tša ka?
Lenaba le nyaka go re thibela go fetša nako le Modimo, ka gona o tla dira gore re swarege kudu ka dilo tše di se nago mohola maphelong a rena. Ge a sa atlege go dira seo, o tla dira gore re kgolwe gore dithapelo tša rena ga di na maatla. Nnete, le ge go le bajalo, ke gore Modimo o kwa thapelo ye nngwe le ye nngwe lefaseng le go araba ka nako ya gagwe. Go Kutollo 5:8, re bala gore barongwa ba kgoboketša dithapelo ka moka tša badumedi lefaseng gomme di nkgela bjalo ka seorelo pele ga setulo sa bogoši sa Modimo. Go Jesaya 59:1 re bala gape gore: Le se gopole gore Morena ga a ne maatla a go kgona go le thuša, goba o thibane ditsebe mo e lego gore a ka se kwe dillo tša lena. Gomme Jakobose 5:16 e tiiša gore dithapelo tša rena di na le maatla: Thapelo ya moloki e na le maatla a magolo.

A re direng thapelo le nako le Modimo dilo tše di tlago pele maphelong a rena lenyaga. Ke madi a rena a bophelo a a re maatlafatšago dinakong tše thata le go re tutuetša go bea tumelo ya rena go di sa kgonege go Modimo yo a se nago magomo. Tšohle di a kgonega go Modimo! Modimo a go šegofatše.