Kholofelo e mpsha (Karolo ya 2) – Letšatši la 14

Gantši ke amogela diemeile go tšwa go babadi bao ba bolelago gore ba katana le go hloka boitshepo goba go inyatša. Mo ke mehlala ye mebedi ya diemeile tše:

Mmadi wa 1: “Go tloga mola ke sa le ngwana, ke katane le go se amogelwe bophelong bja ka. Ge ke gola, go be go mpefala. Hle nthuše!”
Mmadi wa 2: “Naa nka ithuta bjang go ithata? Morago ga matswalo a morwa wa ka, ke thomile go katana le go nona le sebopego sa mmele. Naa o na le keletšo le ge e le efe?”

Radio Tygerberg e hlomile protšeke moo batheeletši ba kago kgetha motho wa go ikgetha maphelong a bona, yo re ka yago ra mo makatša lefelong la gagwe la mošomo. Melaetša e tsene ka bontši gomme re kgethile batheeletši ba mmalwa – go akaretšwa mošemane wa mengwaga ye 9 go tšwa Durbanville, yo a re kgopetšego go yo makatša moithuti-gotee, “Layla o mmotse”, bjalo ka ge a mo hlalošitše, sekolong sa bona.

Re rometše sehlopha sa rena sekolong sa bona ba swere dipalune tše khubedu, matšoba le ditšhokolete. Bjalo ka karolo ya protšeke, re founela mmegi wa rena wa ditaba go tšwa ka studiong gomme ra bolela le motho yo a makaditšwego, go hwetša phetolo ya gagwe. Ge re fihla sekolong sa mošemane kua Durbanville, batswadi ba gagwe le ba Layla ba be le letile ka lethabo ka ntle ga phapoši ya sekolo. Ka gare ga phapoši, Layla o be a dutše, a sa lemoge se se bego se mo letile. Ge a fiwa dimpho le ge a bolela radiong go bile molaleng gore o be a thabile kudu. Mošemane o eme ka myemyelo e kgolo gomme barutwana-gotee ba bona ba bolela gore ba duma eka e ka ba e le bona ba amogelago dimpho.

Morago ga lethabo ka moka, mmago Layla, a tletše dikeledi ka mahlong, o boditše mmegi wa rena wa ditaba gore Modimo o lokile. Beke pele, yena le morwedi wa gagwe ba otletše mmogo ka koloi pele Layla gateetee a re go yena ga a ekwe e le yo a kgethegilego. Re be re sa tsebe se pele ga ketelo ya rena. Modimo, le ge go le bjalo, o kwele mantšu a Layla gomme a kgetha go re šomiša go bontšha lerato la gagwe go yena. Le go dira gore a ikwe a le yo a kgethegilego. Tiragalo ye e nkgopoditše mantšu go Mateu 6:8: “… Tatagolena o tseba tše le di hlokago le pele le mo kgopela tšona!”

Maemo, ditiro goba mantšu a batho goba ditiragalo tše kwešago bohloko di ka, ka dinako tše dingwe, re tšeela boitshepo bja rena goba go re dira gore re ikwe re inyatša. Lenaba o rata seo, ka gobane o tseba gore seo se dira gore re se dire selo le go gateletšega. Modimo, le ge go le bjalo, o na le dikgopolo tše ntši kudu go yo mongwe le yo mongwe wa rena bjalo ka palo ya dithorwana tša lešabašaba la lewatle (Pesalome 139). Theeletša gape go dikholofetšo tša lentšu la gagwe:

Jeremia 1:5: “Ke tsebile pele ke go bopa gore o tla ba eng, ka go kgethwafatša pele o tswalwa ke mmago, ka go dira moprofeta wa ditšhaba.”

Jobo 34:19: Yena (Modimo) yo a sa rerelego bahlomphegi, a sa bebego bahumi go feta badiidi, ka ge bohle ba hlodilwe ke yena?

Lukase 12:7: “Ešita le meriri yohle ya lena e badilwe. Ka gona le se ke la boifa; lena le ba bohlokwa go feta diphorogohlo tše dintši.”

Na o ikwa bjalo ka Layla, eka batho ka moka ba go lebetše? Goba o katana le go se amogelwe bjalo ka mmadi wa 1 goba bjalo ka mmadi wa 2, go ikamogela ka lebaka la ponagalo ya gago ya ka ntle? Ikgopotše gore leina la gago le tlokilwe letsogong la Modimo. O tseba palo ya meriri hlogong ya gago gomme dithulaganyo tša gagwe tša bophelo bja gago di akaretša katlego e se maemo a thata. A re buleng mahlo a rena lehono go bona se Modimo a se dirago. Ka dinako tše dingwe o bontšha lerato la gagwe go rena ka ditsela tše makatšago, go tiiša gore ka nnete re batho ba kgethegilego. Modimo a go šegofatše.