Kholofelo e mpsha (Karolo ya 2) – Letšatši la 13

Melaetša e mentši ya semoya ye re e balago e re gopotša gore Modimo ke Mmuši, gore o na le rena dinakong tše thata le gore a ka se tsoge a re tlogetše goba go re lahla. Ka gona, re ka tseba, ka ntle le pelaelo gore o a tshephega ka dinako ka moka.

Potšišo ya ka go wena lehono, le ge go le bjalo, ke gore naa o a tshephega go yena? Naa Modimo a ka go tshepha gore o mo šireletše – gaešita le ge o le nnoši mošomong wa gago, ka lapeng la gago, nageng ya geno goba setšhabeng? Naa nako ya gago ya setu le yena ke selo se se tlago pele bophelong bja gago goba selo sa pele se o se hlokomologago ge pukutšatši ya gago e tletše ka tše o swanetšego go di dira? Naa o tšwela pele le go tumiša Modimo dinakong tše boima, bjalo ka Jobo, goba o thoma go mo sola ka ditobo tša gago? Go oketša moo, naa o a botega go yo bega molaetša wa ebangedi go sehlopha sa batho se kotsi, bao ba sego ba kwa ebangedi ge Modimo a go etela pele go dira seo, goba o tla boela morago, bjalo ka Jona?

Ka boripana: o botega bjang go Modimo? Jobo o be a sa tsebe gore lenaba le kgopetše tumelelo go Modimo go mo leka. Gape o be a sa tsebe gore mahlo a madira a legodimo a be a le go yena, go bona gore o tla ikarabela bjang go tobo ya gagwe. Le ge go le bjalo, ga se a furalela Modimo. O bontšhitše gore o a tshephega. Jona, ka letsogong le lengwe, o tšere monyetla wa pele wo a bilego le wona go tšhabela Ninibe moo a tsenego ka sekepeng go ya Tarsose.

Kgonthe ya lerato la rena go Modimo le tswalano ya rena le yena di lekwa ka tsela ye re swaraganago le ditlhohlo maphelong a rena. Go 1 Bakorinte 4:1,4 re bala gore: Motho a a re bone re le bahlanka ba Kriste, ba ba beilwego balebeledi ba diphihlo tša Modimo. Ga ke bone phošo ye nka bago ke e dirile, fela ka go realo ga se gore ke re ke lokile. Yo a nkahlolago ke Morena.

Gomme go 2 Timotheose 4:7-8, Paulose o re gopotša ka bohlokwa bja go dula re tshephega go Modimo go fihla mafelelong: Ke šiane mošianong wo mogolo wa tumelo, ke kgathile tema ke e weditše, le tumelo ke sa e swere. Gomme bjale se se ntetetšego ke sefoka se se fiwago ba ba phetšego bophelo bjo bo lokilego; ke letetšwe ke sefoka se ke tlago se fiwa ke Morena ka Letšatši leo a tlago tla ka lona, yena Moahlodi wa toka – sa se fiwe nna fela, eupša sa fiwa le bao ba letetšego go iponagatša ga gagwe ka lerato.

Ge go tshephega ga gago go lekwa lehono, naa o tla lwantšhana le teko bjalo ka Jobo goba o tla tšhaba bjalo ka Jona gomme o furalele Modimo? A re netefatšeng gore re dula re tshephega. Ge e le gabotse, re tla ba kae ge e ba Modimo ga a tshephege? Modimo a go šegofatše.