Kholofelo e mpsha (Karolo ya 2) – Letšatši la 15

Sehloeng sa yona, babadi ba bantši ba mpotšešitše gore maikutlo a ka ke afe mabapi le masetlapelo a Oscar Pistorius. Karabo ya ka ke ye e latelago:

Etla le nna nakwana re boele morago nakong a fetilego. Moo o emego gona ke mmarakeng kua Jerusalema. Modumo wa lešaba le le sa laolegego go tšwa tempeleng o tanya šedi ya gago. O batamela kgauswi gomme ka gare go tempele, o kgarametša lešabeng go ya ka pele. O nyaka go bona gore mmudubudu ke wa eng? Fao lebatong, o a mmona. Mosadi yo mmotse, wa go ema gabotse wa go ba le maswao a mobu dijabaneng le dikhurung tša gagwe. O palelwa ke go itwela. O robegile. Maswao a dikeledi tše diswa a be a bonala marameng a gagwe. Boramangwalo le Bafarisei ba be ba mo dikaneditše. “Ka nnete ke maswabi,” a sebaseba, dikeledi di elela marameng a gagwe. “Homola, mosadi! O na le molato. O swanetše go hwa!”, yo mongwe wa boramangwalo a mo omanya.

Gateetee o lemoga gore go direga eng. Boramangwalo le Bafarisei ba tlišitše mosadi yo, yo a hweditšwego a otsa, tempeleng moo Jesu a bego a ruta lešaba. Ba nyaka maikutlo a gagwe; ba holofela gore o tla bolela se sengwe se ba tlago go se diriša kgahlanong le yena nakong e tlago. “Jesu”, yo mongwe wa Bafarisei a thoma, a hlabošitše lentšu gore lešaba le kgone go mo kwa. “Go molao, Moshe o re laetše gore re kgatle ka maswika basadi ba ba bjalo. Bjale wena o reng?” Pelo ya gago e betha ka lebelo. Mofarisei o šetše a swere leswika ka seatleng sa gagwe – o ikemišeditše go bolaya mosadi yo.

Boemo bo be bo boifiša kudu gomme lešaba le a homola. Batho ka moka ba tsepeletše Jesu. Naa o tla reng ka taba ye? Go e na le go araba Mofarisei, Jesu a inama gomme a thoma go ngwala fase ka monwana wa gagwe. Se  ka nnete e be e se karabo ye Bafarisei ba bego ba e letetše. “Jesu,” a tloša sehuba mogolong, “naa o kwele se ke se botšišitšego?” Batho ka moka ba maketše Jesu a emelela gomme a re, “Yo a se nago sebe mo go lena a e be yena a thomago go mo foša ka leswika.” Gape, a inama gomme a ngwala fase. Jesu o opile kgomo lenaka!

Bao ba kwelego se Jesu a se boletšego ba thoma go sepela, ka o tee ka o tee, go fihlela ge Jesu a šetše fela le mosadi. “Mmagorena, ba kae bona? Na ga go yo a go tšwilego?” Jesu a botšiša. A phumola dikeledi tša gagwe pele a araba. “Ga a gona, Morena.” Gomme Jesu a tšwela pele: “Gona le nna ga ke go tšwe. Sepela, fela o se sa dira sebe.”

Bala kanegelo gape, eupša nakong ye, ipee ka gare ga sediko. Bafarisei ba go dikaneditše, ba go roga ka lebaka la tiragalo e tee bophelong bja gago ye o itsholago ka yona ka mo go feletšego. Naa o tla kgetha ditatofatšo tša bona tše šoro goba kgaugelo ye e sa go swanelago ya Jesu Kriste?

Bjale bea Oscar Pistorius ka gare ga sediko. Ga bjale ke moo a emego, a amogela ditatofatšo tše šoro go tšwa go lefase. Naa o karolo ya bona goba o bontšha kgaugelo ye e sa mo swanelago, o tseba gore ke Modimo fela yo a ahlolago?

Go Mateu 7:1-5 re bala gore: “Le se ke la bona ba bangwe diphošo, gore le lena Modimo a se tlo le bona diphošo, ka gobane ka moo le bonago ba bangwe diphošo ke ka moo le lena Modimo a tlago le bona diphošo, le melao yeo le e šomišago go ba bangwe le go lena Modimo o tla e šomiša. O reng o bona phatšana ye e fahlilego ngwaneno, eupša o sa bone kota ye e fahlilego wena? Na o ka botša ngwaneno wa re: ‘A ke go fahlolle phatšana ye e go fahlilego,’ mola wena o fahlilwe ke kota? Moikaketši tena! Pele iphahlolle kota ye e go fahlilego, ke mo o tlago bona gabotse, wa kgona o fahlolla ngwaneno phatšana ye e mo fahlilego.”

Ke sa kwela bohloko malapa a mabedi a ga Pistorius le Steenkamp, gomme ga ke tšeele fase bohlokwa bja taba ye. Le ge go le bjalo, se ke nyakago go se gatelela ke gore ge re sokologa ditirong tša rena tše mpe, Modimo o re fa menyetla ya bobedi. O fetošitše Saulo, mmolai, go ba moebangedi. Simone, yo a latotšego Jesu gararo, go ba Petrose, leswika le kereke e agilego godimo ga lona. O boditše monna kgauswi le yena sefapanong gore o tla ba le yena paradeising gomme mosadi yo a nyakilego a kgatlwa ka maswika ka lebaka la bootswa, e bile yena wa pele yo Jesu a iponagaditšego go yena ge a tsogile bahung. Naa karabo ya gago e tla ba eng go bao o phelago le bona bao ba itsholago ka tša nakong e fetilego: ditatofatšo tše šoro goba kgaugelo ye e sa ba swanelego? Modimo a go šegofatše.