Kholofelo e mpsha (Karolo ya 2) – Letšatši la 12

Nagana nakwana ka se o naganago ka sona kudu. Tlhohlo mošong? Mathata a ditšhelete ka gae? Bolwetši ka lapeng? Lenyalo la gago le a phuhlama goba pelo ya gago e robegile morago ga ge tswalano e sa šoma? Go beakanya leswa ga khampani ye o e šomelago? Polokego ya ngwana wa gago? Goba mohlomongwe mošomi-gotee lefelong la gago la mošomo, o a go befediša?

Naa o nagana bjang ka seo? Ke ka boitswaro bjo bobotse, o tseba gore Modimo ke Mmuši gomme o laola lefase, le go kgona go dira gore dilo ka moka di šomele go hola ba ba mo ratago? Goba o tsepelela go tše mpe, o itemogela ka fao bokamoso bja gago bo lebegago bo sa kgahliše letšatši le letšatši?

Mo ke mošomo wa gago bekeng ye – lenaneo la mahala la terapi, bjalo ka ge Mark Rutherford a e bitša bjalo:

“Dira metsotso e mmalwa ya terapi ya mahala ya letšatši le letšatši ka go bolela ka dilo tše lesome tše botse tše o di lemogilego go batho ba bangwe. Seo se tla ntšha ka pela dikgopolo tša gago tše mpe. Eupša go bona tše botse go batho ba bangwe ga se tshepetšo ya go itiragalela. O swanetše go bea monagano wa gago go seo gomme o tšwele pele go nyakana le sona.”

Go Bafilipi 4:8, Paulose o re gopotša gore go ba le boitshwaro bjo bobotse le pono e nepagetšego bophelong ke kgetho ya letšatši le letšatši ye o e dirago:

Banabešo, ke fetša ka gore le dule le nagana fela ka tšohle tše e lego tša nnete, tšohle tše di tumišegago, tšohle tše e lego tša go loka, tšohle tše di hlwekilego, tšohle tše di kgahlišago, tšohle tše di dirago gore motho a retwe – a ke re tšohle tše di dirago gore motho e be mothomotho mme a tumišwe ke batho – tšeo ke tšona tše le swanetšego go dula le di nagana.

Ka gona, ke eng dikgopolo tša gago go tlhohlo lefelong la gago la mošomo? Naa o a lemoga gore Modimo a ka go rarollela yona? Mathata a gago a ditšhelete wona? Naa o a mo leboga e sa le bjale ka katlego ya ditšhelete, o tseba gore ditšhelete ka moka lefaseng ke tša gagwe? Ke Mofodiši yo a ka go fodišago goba yo o mo ratago go bolwetši le ge e le bofe – le ge dingaka di sa dumele. A ka phološa lenyalo la gago le ge o nagana gore ga go sa na kholofelo. A ka fodiša pelo ya gago morago ga gore tswalano ya gago e thubege le go romela motho wa meleba go wena, yo a lego kaone kudu go wena. O tseba bokamoso bja gago gomme ge o lahlegetšwe ke mošomo wa gago, a ka go thuša go hwetša mošomo wa ditoro tša gago khampaning e mpsha. O kgona go šireletša bana ba gago go maemo a kotsi kudu. Ge e le mabapi le mošomi-gotee lefelong la gago la mošomo, yo a go befedišago – naa o šetše o thomile go mo rapelela? O ka makatšwa ke ka fao Modimo a kago fetoša bobedi bja lena gore le kwane gateetee, ga ešita le go ba bagwera! Modimo a go šegofatše.