Kholofelo e mpsha (Karolo ya 2) – Letšatši la 11

Mo ke bopaki ka Handré de Jongh gore Modimo o na le kgahlego go lenaneo la dilo tše di tlago pele bophelong bja gago:

Handré: “Ka 19:00 ka Sontaga ya Paseka ka 2009, ke amogetše mogala go tšwa go tate. Yena le mma ba be ba le tseleng ya go boela morago go ya Beaufort West, morago ga go fetša mafelelo a beke le lapa la ka kua Hartenbos. Kudu e tabogetše pele ga koloi gomme ya betha mma sefahlegong. Ge ke bolela le tate mogaleng, ke kwele mma ka morago a palela ke go buša moya. Ka go makala, ke founetše maloko a lapa la ka go ralala le naga gomme ra thoma go rapelela mma.

Ge ba fihla sepetlele kua George, hlogo ya mma e be e kokomogile ganne go feta bogolo bja yona. Lerapo le lengwe le le lengwe le be le robegile gomme bjoko bja gagwe bo gobetše. Dingaka di mo tsentše metšheneng ya go mo thuša go hema gomme ba re fa diiri tše 48 go tlo mo dumediša le go mo laela, ka ge ba be ba sa nagane gore o tla phela. Ka phapošing ya go letela ya sepetlele, re swarane ka matsogo bjalo ka lapa; re jele selalelo gomme ra rapelela mohlolo. Re kwele o ka re ga se nako ya mma ya go hlokafala. Matšatši a mabedi ka morago, o phafogile gomme a dula mpeteng wa gagwe. Se, le ge go le bjalo, e bile nakwana, gomme a idibala gape nako e telele gomme a tsenywa metšheneng ya go thuša go hema gape.

Le ge dingaka di rile mma o hwile monagano, re tšwetše pele le go rapelela phodišo ya gagwe. Re tšwetše pele go bolela le yena le ge re be re se na nnete ya gore o a re kwa. Sa go kgahliša kudu e bile gore o be a fetola nako le nako ge re bolela ka Jesu Kriste goba re raloka mmino wa sedumedi go iPod ya gagwe. Mmele wa gagwe o tšwetše pele le go mpefala ka ge bjoko bja gagwe bo be bo sa šome gabotse.

Morago ga diopareišene tše ntši go sa šetšwe mathata ka moka, mma o phafogile morago ga go idibala dikgwedi tše tharo – bjoko bja gagwe bo šoma gabotse. Batho ka moka sepetlele ba be ba maketše! Ke botšišitše mma, dibeke tše mmalwa ka morago, ge e ba o be a le legodimong nakong ya go idibala ga gagwe. O fetotše ka gore o be a se legodimong, eupša Jesu o be a na le yena. Nakong ye nngwe o lemogile monna yo mogolo kgauswi le mpete wa gagwe. O be a na le matsogo a magolo, a tiilego kudu eupša ka kgwatho e boleta kudu ge a mo kgwatha. O tsebile le semeetseng gore e be e le yena. Motsotsong o latelago, ba be ba sepela mmogo lewatleng gomme ba boledišana.

Jesu o boditše mma gore dilo tše di tlago pele bophelong bja gagwe di be di fošagetše. Mma o be a maketše: ‘O ra go reng, Jesu?’ a fetola: ‘Morwedi wa ka, ga ke wa pele bophelong bja gago ka mehla. Ditlogolo ba gago ke bona. Gwa latela bana ba gago. Ke wa boraro. Phuthego ya gago ke ya bone gomme monna wa gago ke wa bohlano.’ Le ge mma wa ka a be a rata tate gomme ba dira dilo mmogo, o tsebile pelong ya gagwe gore Jesu o be a nepile. ‘O nyaka gore lenaneo le lebege bjang?’ Jesu a fetola: ‘Ke nyaka go ba yo a tlago pele bophelong bja gago ka mehla maemong ka moka. Monna wa gago e be wa bobedi.’ Mma wa ka a botšiša le semeetseng; ‘Bjale, bana le ditlogolo tša ka bona?’ Jesu a tšwela pele: ‘Bana le ditlogolo tša gago ke dikenywa tša kgwerano ya gago le monna wa gago. Lena ba babedi le eme pele ga ka. Ke ka lebaka leo a swanetšego go tla la bobedi bophelong bja gago. Bana ba gago e ba ba boraro gomme ditlogolo le phuthego ya gago ya ba ba bone.’ Mma wa ka o re lerato le kwelobohloko tše a boletšego le yena ka tšona, e be e le tše kgolo moo a nyakilego go fetoša dilo tše di tlago pele bophelong bja gagwe le semeetseng!

Ke be ke le kgauswi le mpete wa mma ge a phafoga. Bjalo ka morwa wa gagwe yo mogolo, ke mo tseba gabotse gomme ka nagana gore o tla botšiša le semeetseng ka bana ba gagwe le ditlogolo. Ga se a dira seo. O nyakile go tseba gore tate o kae. Ka dikeledi ka mahlong a gagwe, o tšere letsogo la gagwe kgauswi le mpete gomme a mo atla lerameng. Bjo e bile boitemogelo bja ka bja pele bja phetogo bophelong bja mma. Dikgwedi tše mmalwa tša go latela, ke bone ka fao metsotso ya gagwe e lesome thapelong e fetogilego go ba diiri. Yena le tate ba ratana kudu lehono, go feta pele. O sa na le tswalano e tiilego le bana le ditlogolo tša gagwe ka moka, gomme o sa kgatha tema phuthegong ya gagwe, eupša nakong ye, go na le tekatekano ye e lego molaleng bophelong bja gagwe. O beakantše gabotse dilo tše di tlago pele bophelong bja gagwe.

Le ge re be re sa kwešiše pele gore ke ka lebaka la eng Modimo a dumeletše kotsi e šoro gore e direge, ke itemogetše ka fao maphelo a mantši le manyalo a fodišitšwego le go fetoga, ge batho ba ekwa bopaki bja mma gomme ba fetoša dilo tše di tlago pele maphelong a bona. Kotsi e šoro bjale e tliša phodišo e kgolo go batho ba bantši! Letago ka moka go Modimo.”

Handré o nepile. Modimo ke Modimo wa molao gomme o nyaka gore re be le lenaneo la maleba la dilo tše di tlago pele maphelong a rena. Go Mateu 6:33 re bala gore: “… sa pele le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona.” Gomme go Lukase 12:34 re bala gore: “… mo go lego lehumo la motho ke mo go bago pelo ya gagwe.” Naa dilo tše di tlago pele bophelong bja gago di lebega bjang lehono? A re mmeeng pele le go hlompha kgwerano ye re e dirilego le yena. Modimo a go šegofatše.