Bible Society of South Africa
Dithulaganyo tša go bala
Kgonthišetšo e šegofaditšwego
Kgonthišetšo e šegofaditšwego – Letšatši la 9
Xanthe Hancox

Kgonthišetšo e šegofaditšwego – Letšatši la 9

Mašole a Bakriste ao a tšwelago pele

(Di)temana ya Bibele

2 TIMOTHEOSE 2

3O kgotlelele le nna ditlaišo, o be mohlabani yo a botegago wa Kriste Jesu. 4Gape mohlabani o leka go kgahla molaodi wa gagwe gomme ga a itsenye ditabeng tša bophelo bjo e sego bja bohlabani. 5Le mophadišani a ka se thope sefoka a sa latele melao ya go phadišana.

2 TIMOTHEOSE 2:3-5NSO00Bula go Mmadi wa Bibele

BAEFESO 6

Tša phedišano ya bana le batswadi ba bona

1Lena bana, le hlomphe batswadi ba lena ka ge le le ba ba dumelago go Morena, gomme seo e le se se lokilego. 2“Hlompha tatago le mmago” ke molao wa mathomo wo o nago le kholofetšo ye e o tlaleletšago ka go re: 3“gore o tle o atlege, o phele nako ye telele mo lefaseng.”

4Lena botatagobana, le se galefiše bana ba lena. Sa lena e be go ba godiša ka kgalemo le thuto ya Morena.

Tša phedišano ya makgoba le beng ba bona

5Lena makgoba, le hlomphe ka botlalo beng ba lena ba mo lefaseng, gomme seo le se dire ka botshepegi, bjalo ka ge nke le direla Kriste. 6Seo le se se direle gore ba le bone mme ba le rete, eupša ka dipelo tšohle tša lena le dire se se nyakwago ke Modimo, ka ge le le makgoba a Kriste. 7Le ba šomele ka dipelo tše ditšhweu mo nkego le šomela Morena, e sego batho. 8Le a tseba gore Morena o tla putsa bohle, makgoba le balokologi, ka lebaka la tše dibotse tše ba di dirago.

9Lena bengmakgoba, le sware makgoba a lena ka wona mokgwa woo, gomme le tlogele go hlwa le ba tšhošetša. Le gopole gore lena le makgoba a lena mong wa lena ke o tee wa legodimong, yo a sa kgethollego batho.

Badumedi ba itlhamele go lwa le meoya ye mebe

10A ke fetše ka go re: Ikopanyeng le Morena le itiiše le ka maatla a gagwe. 11Itlhameng ka dihlabani tšohle tše Morena a le fago tšona gore le kgone go iphahlela bomenemene bja Diabolose. 12Gobane ya rena ntwa ga se ya go lwa le batho ba nama, ke ya go lwa le meoya ye mebe ya lefaufaung, e lego magoši a semoya, le balaodi ba semoya, le babuši ba lefase le lebe le. 13Ka fao, itlhameng ka dihlabani tša Modimo, gore mohla go le gobe le kgone go iphahlela; e tle e re ge le lwele go fihla mafelelong a ntwa le ikhwetše le ba paletše.

14Ka gona, ebang komana madulaabapile, gomme nnete e be bjalo ka lepanta la go itlema letheka, toka e be bjalo ka sefahlo sa kgara, 15mafolofolo a lena a go bega Ebangedi ya khutšo e be dieta tša lena. 16Ntle le tšeo, tumelo e be thebe ya lena, gobane ka yona le tla kgona go tima mesebe ye e tukago ye Rabobe a le hlaselago ka yona. 17Le amogele phologo ye e lego mpho ya Modimo; e tla le šireletša boka kefa ya tshipi. Le amogele le molaetša wa Modimo wo le o fiwago ke Moya wo Mokgethwa; wona o tla ba bjalo ka tšhoša. 18Tšohle tše le di dire le rapela, le kgopela Modimo gore a le thuše. Le rapele ka mehla ka mo le hlahlwago ke Moya. Ka gona, le phafoge le sa lape, le dule le rapelela badumedi bohle. 19Le nna le nthapelele gore Modimo a mpotše se ke swanetšego go se bolela ge ke ahlama, gore ke utolle sephiri sa Ebangedi ke sa šie. 20Le ge gonabjale ke le sebofša, ke sa ntše ke le mmaditsela wa go bega Ebangedi ye. Le nthapeleleng gore ke bolele ka yona ke sa boife, bjalo ka ge ke swanetše.

Ditumedišo tša mafelelo

21Tigikose, ngwanaborena yo re mo ratago, yo e lego mohlanka wa go botegela modiro wa Morena, o tla le anegela tšohle ka nna, gore le lena le tsebe ka mo ke phelago ka gona. 22Ke ka lebaka leo ke mo romago go lena gore a tle a le botše gore na re phela bjang, le gore a tle a le kgothatše.

23A Modimo, Tatagorena, le Morena Jesu Kriste ba kgontšhe badumedi go phedišana ka khutšo le go ratana le go dumela go Modimo. 24A Modimo a gaugele bohle ba ba ratago Morena wa rena, Jesu Kriste, ka lerato le le sa felego.

BAEFESO 6NSO00Bula go Mmadi wa Bibele

O kgotlelele le nna ditlaišo, o be mohlabani yo a botegago wa Kriste Jesu. Gape mohlabani o leka go kgahla molaodi wa gagwe gomme ga a itsenye ditabeng tša bophelo bjo e sego bja bohlabani. Le mophadišani a ka se thope sefoka a sa latele melao ya go phadišana. 2 Timotheose 2:3-5

“Mašole a Bakriste ao a tšwelago pele” e ngwetšwe ka 1865 e se na maikemišetšo a go ka gatišwa. Moruti Sabine Baring-Gould, mongwadi, ka nako yeo e be e le leleko la kereke kua Yorkshire County ka leboa la Engelane, gomme kanegelo ya gagwe ya ka fao le gore ke ka lebaka la eng a ngwetše sefela se e sa le gona:

“E ngwetšwe ka tsela ye bonolo. Mošupologo wa Whit ke letšatši le legolo la meletlo ya dikolo kua Yorkshire, gomme ka Mošupologo wo mongwe wa Whit, go rulagantšwe gore sekolo sa rena se kopane le sekolo motsaneng wa kgauswi. Ke be ke nyaka bana ba opele ge ba gwanta go tloga motsaneng o tee go ya go wo mongwe, gomme ka sa nagane ka selo le ge e le sefe sa maleba, gomme bošego ka tšea sephetho sa ngwala se sengwe. ‘Mašole a Bakriste ao a tšwelago pele’ e bile poelo. Se ngwetše ka lepotlapotla le legolo gomme ye mengwe ya methalotheto e na le diphošo. Ka nnete, ga go selo se se mmakaditšego go feta botumo bjo bogolo bja sona.”

Sefela se na le morero wa sešole le molodi wa go gwanta gomme se ile sa swaiwa diphošo. Diphuthego tše dingwe di tlošitše sefela go dipuku tša bona tša difela ka mo go feletšego.

Eupša ga re ntweng? Mantšu a sefela a hlaloša gabotse gore tsepelelo e go ntwa ye ya semoya – gore lenaba la rena ke Sathane, e se batho, le gore Kgoši ya rena le Molaodi yo Mogolo ke Kriste Raamatlohle wa go sa felego yoo mmušo wa gagwe o ka se palelego.

“Mašole a Bakriste ao a tšwelago pele, a gwanta go ya ntweng,

Ka sefapano sa Kriste se ba etile pele.

Kriste, Kgoši ye kgolo, o etile pele kgahlanong le lenaba;

go iwa ntweng, bona difoka tša gagwe di a sepela!”

Bibele e re ruta gore Sathane o thomile ntwa kgahlanong le Modimo le bao ba mo latelago. E ka no se be ntwa ya nama, eupša ke ntwa ya kgonthe gomme ga gona lefelo la magareng. Bakriste ka moka ba ntweng ya semoya. Lengwalong la gagwe go Timotheose, Paulose o šomiša polelo ya sešole go hlaloša bogolo bja boikgafo bja rena go ntwa ye ya semoya. Ge re ngwadišitše, re swanetše re ikemišetše go tlogela thato ya rena – re swanetše go amogela mošomo wo o filwego le go itokišetša go fiwa mošomo. Go Baefeso 6, o laela kereke go “itlhama ka dihlabani tšohle tša Modimo” ka gobane re lwa le meoya ye mebe ya lefaufaung.

Ba bantši ba ikemišeditše go swara sefoka, eupša ga se ka moka bao ba ikemišeditšego go phegelela seo maphelong a bona. Naa o ikgafile? O ikemišeditše go emelela le go lwela Jesu Kriste? Mašole a Bakriste ao a tšwelago pele!

Bible Society of South Africav.4.27.6
RE HWETŠE GO