Kgonthišetšo e šegofaditšwego – Letšatši la 8

“Eya lapeng la mmopi wa dipitša, gomme moo ke tla go botša se o swanetšego go se botša setšhaba sa Israele.” Ka fao ka ya gona gomme ka hwetša mmopi a le modirong wa gagwe wa go bopa. Ge a be a ka re a bopa pitša ya se bopege gabotse, o be a tšea letsopa leo a bope ye nngwe ye e mo kgahlago. Jeremia 18:2-4

Adelaide Pollard e be e le mongwadi wa difela wa Amerika yo a bego a na le toro – o be a nyaka go ya Afrika bjalo ka moromiwa. Ka bomadimabe, o paletše ke go kgoboketša tšhelete ye e bego e nyakega ya leeto. A nologile moko kudu, o ile tirelong ya thapelo bošegong bjo bongwe gomme a dula fao, o kwele mokgekolo rapela, “ga go na taba gore o dira eng ka rena, Morena, dira se o se ratago maphelong a rena”.

Adelaide o kwešišitše mantšu a mokgekolo. O ile gae gomme a naganišiša ka thapelo ya mokgekolo le go bala temana go Jeremia 18:3-4. Ka lebaka leo, o ngwetše sefela seo se opetšego ke dimilione tša batho:

Dira se o se ratago, Morena!

Dira se o se ratago!

Wena o mmopi; nna ke letsopa.

Mpope gomme o ntire go ya ka thato ya Gago,

Mola ke letile, ke ineela gape ke homotše.

Bjalo ka Adelaide, gantši re a lebala gore re letsopa, e se mmopi. Paulose o a re gopotša go Baroma 9:20, “Kgane sebjana se ka botšiša mmopi wa sona sa re o be o reng o mpopa ka mokgwa wo?” Modimo o a re bopa le go re dira sebjana se a nyakago re be sona. Ga se tshepetšo e bonolo. Go bopša le go fetošwa go ba sebjana se se ka šomišwago go mošomo wa Modimo go bohloko, eupša go bohlokwa.

Pele ga Ntwa ya Pele ya Lefase, Adelaide o ile Africa. Le ge go le bjalo, ntwa e mo gapeleditše go ya Scotland. Morago ga ge ntwa e fedile, o boetše United States moo, le ge a be a babja, o rerile kua New England.