Kgonthišetšo e šegofaditšwego – Letšatši la 10
Tšea bophelo bja ka
(Di)temana ya Bibele
BAROMA 12
Go hlankela Modimo ka dimpho tša moya
Bjale ge, banabešo, ka ge Modimo a re gaugetše gakaaka, ke a le kgopela ke re: Ineeleng go yena le be sehlabelo se se phelago, se sekgethwa se se mo kgahlago. Baroma 12:1
Frances Ridley Havergal (1836–1879) o be a na le bokgoni kudukudu. O be a kgona go bala le ngwala ka mengwaga ye mene. O ngwetše puku ya gagwe ya pele ya direto ge e na le mengwaga ye šupa. O be a kgona go bolela Selatine, Segerike, Seheberu, Welsh le Sefora. O be a ipshina ka go thelela lehlweng kua Dithabeng tša Switzerland – boithabišo bjo bo bego bo sa tlwaelega ka ngwagakgolo wa lesemosenyane. E be e le seopedi se atlegilego. E be e le mongwadi yo dipuku tša gagwe di balwago kudu le yo a ratwago kudu, mosadi a nnoši pele ga ngwagakgolo wa masomepedi yo a gatišitšego dipuku tša go feta tše milione. Gape o ngwetše difela tše ntši, tšeo di tšwelago pele go opelwa ke Bakriste lefaseng ka bophara.
Ye nngwe ya difela tša go tuma tša Havergal ke “Tšea bophelo bja ka”. Ka talente ya gagwe ka moka le thuto, Frances Havergal o bile le tumelo e bonolo le boitshepo go Morena wa gagwe bjoo bo bonagalago go methaladi ye:
Tšea bophelo bja ka, gomme bo šegofatšwe, Morena, go wena.
Tšea dinakwana tša ka le matšatši a ka; anke di elele ka tumišo ye e sa kgaotšego.
Ye nngwe ya methaladi go temana ye nngwe e re, “Tšea silibera ya ka le gauta ya ka; le tšheletiana nka se gane ka yona”. Ka 1878, mengwaga ye mene morago ga go ngwala sefela, Havergal o ngwaletše mogwera wa gagwe, “Morena o ntaeditše kgato ye nngwe ye nnyane, gomme ke ke e tšere ka lethabo le legolo. ‘Tšea silibera ya ka le gauta ya ka’ bjale e ra gore go iša mekgabišo ya ka ka moka go Ntlo ya Baromiwa ya Kereke, go akaretšwa le kabinete ya dibjenyabje tšeo di loketšego mohumagadi, moo ka moka di tlago amogelwa le go lahlwa go nna. Ke paka mo go nyakilego go e ba diathikele tše 50. Ga ke nagane gore e sa le ka paka lepokisi ka lethabo le bjalo.”
Frances o kwešišitše se Paulose a bego a se bolela go Baroma ge a bolela ka borapedi bja nnete. Karolo ye nngwe le ye nngwe ya maphelo a rena ke karolo ya borapedi; ga se fela karolo ya go opela ya tirelo ya Sontaga ya kereke ya gago. Go tumiša ke go godiša motho goba se sengwe ka ditiro tša rena, dikgopolo goba mantšu. Re tumiša go tloga ka nako ye mahlo a rena a bulegago mesong go ya go motswatswana wo a tswalelago bošego.
Ke fela ka go neela le go gafela maphelo a rena ka moka moo re ka tumišago Modimo gabotse le go phethagatša morero wa rena le mošomo lefaseng le. O tla tumiša bjang lehono?
