Kgaugelo ya Modimo, lerato le maatla – Letšatši la 8

Ge o dumela seo, ka pelong ya gago, ga o a loka, se ka ba le ditlamorago tše šoro – go sa šetšwe gore o dumetše bjang se. Batho ba ba dumelago se ka bobona, ba ikarabela ka mo go fapanego.

Ba bangwe ba ka ikgogela morago: “Ga gona se sebotse se nkago se dira, ka gona ga go na mohola!” Ka tsela ye, ba lahlegelwa ke boitshepo bja bona. Ga ba sa itshepha gomme ga ba dire selo, ka ge ba boifa gore ba tla solwa le go nyatšwa.

Ba bangwe ba tla dira tšohle go thuša ba bangwe, ka kholofelo ya gore ba tla lemogwa. Phetolo ya boraro, ka lebaka la maitemogelo a mabe, e tla ba go itshwara gampe. Ba tla sola le go nyatša batho ba bangwe. Bjale ba dira go ba bangwe seo bona ba itemogetšego sona.

Jesu a ka se tsoge a go lahlile. A ka se re o a palela goba ga o na mohola. Go feta batho ka moka, Jesu o tseba gore go ra go reng go lahlwa le go se ratwe. E be e le Morwa wa Modimo yo a gafilego dilo ka moka gore re phologe. Batho ba be ba bolela ka go mo nyatša: “Na kgane ga se yena morwa wa mmetli?” Go Lukase, batho ba be ba nyatša thero ya gagwe mo mafelelong ba mo rakilego ka sinagogeng.

Go be go sena yo a mo amogelago, gaešita le baetapele ba bosetšhaba. Mahlong a bona, Jesu o be a loketše fela ke go kokotelwa sefapanong. Jesu a tlaišwa. Eupša Jesu yo o a re kgothatša, ka go bolela gore o a re rata le go re amogela ka tsela ye re lego ka yona. Ka yena re ka iketla, le ge re ikwa re le ditlatla goba go se itshepe goba go ikgogomoša. Ka yena, re ka hwetša khutšo ya meoya ya rena.