Kgaugelo ya Modimo, lerato le maatla – Letšatši la 7

Yo mongwe e sa le a mpotša kanegelo ya ka fao malome wa gagwe, mengwaga ya go feta, a bego a mo putsa ge a hweditše dipoelo tše botse tša sekolo. O be a mo fa diranta tše hlano ge a hweditše diphesente tše 60; diranta tše lesome ge a hweditše diphesente tše 70; gomme diranta tše 15 ge a hweditše diphesente tše 80. O be a na le mahlatse go hwetša diphesente tše 80 ka mehla. Lebakeng le lengwe, ga a fihlelela seo. A nagana gore o lahlegetšwe ke diranta tša gagwe tše 15. Eupša malome wa gagwe a re: “Ke sa go fa diranta tše 15 ka gobane ke nyaka gore o tsebe gore di sa go swanela, le ge o sa hwetša diphesente tše 80.”

Tiragalo ye e re botša ka fao Modimo a ikwago ka gona ka rena. Go sa šetšwe gore re bo mang, go sa šetšwe gore re dira bjang goba ga re dire – ka mehla re tla ba bohlokwa mahlong a Modimo.

Motho o kwa ka batswadi bao ba iphetolelago gampe go dipoelo tše mpe tša sekolo tša bana ba bona: “O ka se ye felo! Ga go se o ka se dirago gabotse?” Ka bomadimabe, dipolelo tša go swana tše mpe di a bolelwa magareng ga batswadi le baratani. Ge batho ba ekwa kudu ditshwayotshwayo tše bjalo tše mpe, mafelelong ba tla amogela le go nagana gore ga ba na mohola. Baamogedi ba tsholo e bjalo ba itemogela yona bjalo ka tahlo gomme se se ba bakela bohloko.

Maitemogelo a bjalo e ka ba karolo ya bophelo bja gago ka moka, gomme dipoelo ke gore o dumela dilo ka wena tše e sego dinnete – go dumela gore ga o na mohola.

Sakiose le yena o be a nagana gore ga a na mohola. O utama mohlareng morago ga matlakala. Eupša Jesu o bontšha gore o hloka Sakiose. O ka no se dumele le wena, eupša Jesu o a go hloka.

Le wena o amogetše dimpho le ditalente – di šomiše. Di tla thuša go ipona go se be le mohola ga gago. Yo mongwe o rile ge o sa šomiše dimpho le ditalente tša gago, o tla lebega bjalo ka sejato se se bolokago tšhelete ya sona. Ka tsela ye, o a itima le go tima ba bangwe.