Kgaugelo ya Modimo, lerato le maatla – Letšatši la 9

Re boletše ka molekgetho, Sakiose, pejana. O be a nyaka go bona Jesu gomme a namela mohlare, tseleng ye Jesu a bego a sepela ka yona. Jesu, ka ge re bala go Mateu 21:31-32, o be a phedišana le balekgetho le digwebakathobalo. Le mohlomongwe ke lona lebaka le Sakiose a bego a nyaka go bona Jesu ka sebele.

Mohlomongwe, Sakiose o be a nyaka go tseba Jesu. A ke nagane gore o be a na le tlhoko e kgolo ya semoya go bona Jesu. Se e lego nnete ke gore ge a bona Jesu, go tšwa mohlareng o a bego a dutše godimo ga ona, a hwetša bophelo bjo boswa. Ekaba o be a nyaka Jesu? Ga ke nagane bjalo. Ge e le gabotse, o be a na le maikemišetšo ao a sa tšwelelego gabotse. Eupša tshepetšong, a hwetša Jesu.

Lebaka la gore Sakiose a hwetše Jesu ke gobane Jesu o be a nyaka Sakiose. Ge Jesu le lešaba ba feta kgauswi le mohlare moo Sakiose a bego a dutše gona, Sakiose ga se a goeletša Jesu. Aowa, ka gobane se ga se lona lebaka la gore a dule mohlareng. O be a nyaka go bona Jesu, eupša o be a sa nyake go batamela kgauswi le yena.

Lega go le bjalo, Jesu a bitša Sakiose. Selo se se lemogegago ke gore Jesu o mmiditše ka leina. Ga re fela difahlego ka gare ga lešaba. Go yena, re batho ba a ba tsebago ka maina. O nyaka go ba karolo ya maphelo a rena, le lehono. “Sakiose, fologa ka pela, gobane lehono ke swanetše go yo hlwa ka ga gago” (Lukase 19:5). Sakiose, ke eme lemating la pelo ya gago, mpulele lemati la pelo ya gago lehono.