Kgaugelo ya Modimo, lerato le maatla – Letšatši la 15

Ka dinako tše dingwe re nagana gore rena, bao ba dumelago go Modimo, re tla tšhabela bohloko le manyami bophelong. O ka tseba Modimo, gomme go be le dinako tše boima lenyalong la gago. O ka ba o kgopetše Modimo, ka thapelo, go go hlahla go kgetha mošomo wa maleba, gomme ga bjale dilo di boima mošomong wa gago.

Go nkgopotša ka nako ge Jesu a laletša barutiwa ba gagwe go tsena le yena ka leselawatleng, go ya ka mošola wa letsha. Ba itemogela ledimo le legolo gomme barutiwa ba tšhoga kudu ka gore ba tlo nwelela. Jesu a hloya se gomme a botšiša: “E kae tumelo ya lena?” Babe ba lebetše gore o ba laleditše, le gore a ka be a netafaditše gore ba tla fihla ba bolokegile ka mošola? Jesu e be e le kgonthišetšo ya gore ba tla bolokega. Morago ga fao, Jesu a homotša ledimo.

Re swanetše re letele se ka maphelo a rena. Ka mehla go tla ba le madimo, le ge re le ka gare ga leselawatle le Jesu. Re swanetše go gopola dilo tše pedi. Sa pele, maatla a bobe, bolwetši, bophelo le lehu ke a maatla. Bophelong, gantši re kopana le maatla a. Eupša selo sa bobedi se re swanetšego ke go se tseba ke gore maatla a Jesu ka mehla a na le maatla kudu. O šomiša maatla a gagwe go re etela pele ka gare ga mathata.

Gantši pelaelo le poifo ya maemo a rena e ba tše kgolo, mo re lebalago gore maatla a Jesu ke a magolo kudu. Tumelo ke go tshepha Jesu, gore o tla go hlokomela, go dumela gore bophelo bja gago bo diatleng tša Modimo, le go dumela gore Jesu o gona bakeng sa gago le gore o tla phethagatša dithulaganyo tša gagwe ka bophelo bja gago.

Jesu o holofeditše: “Tsebang gore ke tla ba le lena ka mehla go fihla mohla lefase le fela” (Mateu 28:20).