Kgaugelo ya Modimo, lerato le maatla – Letšatši la 14

Seswantšho ka morwa wa go timela se sa tanya šedi. Mošemane yo a lapišitšwego ke go dula polaseng, o tšere kabelo ya gagwe, a tloga gomme a feleletša a le ka hokong ya dikolobe.

Tatago mošemane ga se a gana. O mo dumeletše go sepela. Modimo o dira se ka rena gape. Ge re se sa nyaka go ba le yena, o re tlogela re sepela. Ka nnete, a ka se nyake re tloga. O re fa kabelo ya rena: mahlo a rena, ditsebe, matsogo, monagano, selo sefe goba sefe se Modimo a re filego ge re belega. Ka se, o ka dira ka mo a nyakago.

Eupša bophelo bjo bja go hloka Modimo bo lebega bjang? Bophelo ka ntle le kereke, tumelo le Bibele? Ekaba go na le morero bophelong bjo bjalo? Morwa seswantšhong, mohlomongwe, o ipshinne ka bophelo. Eupša morago, a gopola se sengwe. O be a se na mogwera, mogwera wa kgonthe. Ge tšhelete ya gagwe le go ipshina di fedile, o be a se na bagwera. O be a dula le dikolobe fela. Gomme a monofalela dikolobe ka gobane tšona, bonyenyane, di be di na le dijo.

A lemoga, ka nako yeo, gore tatagwe ge e le gabotse e be e le mogwera wa gagwe. Gwa fihla go yena gore tatagwe o be a sa swane le mothwadi. Go be go na le malao ntlong ya tatagwe, eupša tatagwe o be a mo rata. A lemoga gore o dirile phošo gomme a tšea sepheto sa go boela gae. Seo e bile sepheto sa go bontšha sebete.

A ipotšiša ge eba tatagwe o tla mo amogela morago. Ee, a nagana, ka gona tate ke mogwera wa ka, ga go bjalo? Gomme gwa ba bjalo. Tatagwe o be a mo letile gomme a mo amogela ka matsogo a bulegilego.