Ke tla – Letšatši la 8

Ge motšeadiswantšho wa go tuma Kevin Abosch a tšea seswantšho se tsebjago ka #345 sa tapola la Irane, ke a kgolwa gore o be a sa, ditorong tša gagwe, nagane gore rakgwebo wa go se tsebalege wa Europa a ka, dibeke tše mmalwa tša go latela, bona seswantšho sa tapola (seo se tšerwego ka bokamorago bja mmala o moso) le go se reka ka milione wa €1. Ge a botšišwa gore o be a nagana gore tapola e ka ba bohlokwa kudu, Abosch a myemyela gomme a re ga a sa gopola nako ye a tšerego seswantšho ka ge a tšere diswantšho tše ntši tša ditapola letšatši leo.

Ka lebenkeleng tapola e tee ga e ture. Lega go le bjalo, ka diatleng tša maleba, tapola ye e sa turego e ka bitša dimilione.

Le ge Modimo a re bopile ka bokgoni bjo bogolo, ka dinako tše dingwe, ka lebaka la dipheto tše fošagetšego, manyami goba mantšu a kgobošo a batho ba ba swanetšego go re rata, re ikwa o ka re ga re na mohola. Moo ke mo lenaba le nyakago go re bea gona. Modimo, ka letsogong le lengwe, ga a na magomo go seo A kago le go nyaka go se dira maphelong a rena ge re e ba didirišwa tše obamelago ka matsogong a Gagwe.

Lebelela Moshe. O be a kgamakgametša ge a bolela, eupša Modimo a mo šomiša go ntšha Baisraele bokgobeng. Gidione e be e le mohlabani wa lefšega wa go inyatša, eupša Modimo a mo šomiša go etela pele Baisraele ntweng e kgolo. Dafida e be e le modiši, yo monnyane go barwarre ba gagwe eupša Modimo a kgetha go mo dira kgoši ya Israele ka gobane pelo ya gagwe e be e le lefelong la maleba. Rahaba e be e le segwebakathobalo, eupša Modimo a mo šomiša go phološa maphelo a dihlodi kua Jeriko, ka gobane o be a obamela gape a le gona.

Go Ditiro 10:34-35, re a gopotšwa gore Modimo ga a hlomphe motho. O re rata ka moka ka mo go swanago. Go Jeremia 29:11, O re o na le merero ya katlego e se ya go re kweša bohloko. Gomme go Pesalome 139:13-18, mopesalome o re gopotša ka bohlokwa bja rena go Modimo ge a ngwala gore: “Ditho tša ka tšohle di hlodilwe ke wena; ke wena o di kgomagantšego ka popelong ya mma. Ke go reta ka ge o mpopile ka mo go makatšago gape go tlabago; ditiro tša gago di a makatša. Seo ke se ke se tsebago gabotse. Mola ke bopša ka sephiring, mola ditho tša ka di kgomaganywa ka hloko ka popelong ya mma, ga go na le le tee la marapo a ka le o bego o sa le bone. O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona. Aowii, Modimo, tše o di naganago nna di a mpalela; ga se ka bontši! Ge nka re ke a di bala, di feta dithorwana tša lešabašaba.”

Letapola la Irane, #345, le ka ba le sa dira selo gore le be bohlokwa kudu. Le beilwe fela ka matsogong a maleba ka nako ya maleba. Letšatši le letšatši Modimo o lebelela lefaseng go ka hwetša didirišwa go phethagatša ditsela tša Gagwe lefaseng (2 Dikronika 12:9). A re mo dumelele a fodiše dikgobalo tša rena, a re tlatše ka boitshepo le go re šomiša moo a re hlokago. Ge go le bjalo, re ka ema ka go makala go dilo tše kgolo tše bohlokwa tše A ka di dirago maphelong le ka maphelo a rena. Gopola gore o yo bohlokwa kudu go Yena. Modimo a go šegofatše.