Ke tla – Letšatši la 9

Kapejana ka morago ga bošegogare ka Mokibelo goseng, dimpša tša Wicus le Adrie Scheepers tša thoma go gobola ntlong ya bona kua Pretoria-West. Wicus a tsoga go bona se se bego se direga. Pele a ka tšwa ka ntlong, Adrie a mo gopotša go apara besethe ye e sa phulwego ke dikolo. Seo se phološitše bophelo bja gagwe. Ka ntle bahlokodi ba mo thuntšhitše gabedi mokokotlong gomme ba leka go mo hlasela ka thipa. Dikolo di thibetšwe ke besethe gomme thipa ya kgomarela go materiale wa yona. Go poledišano ya gagwe le Netwerk24 morago ga tiragalo yeo, Wicus o rile: “Ge nkabe ke sa apara besethe, nkabe ke hlokafetše.” A tlaleletša ka gore ga se besethe ya go thibela dikolo fela ye e mo phološitšego: “Modimo o be a le fao gomme A ntšhireletša.”

Go Baefeso 6:12 Paulose o re gopotša ntwa ya rena ya letšatši le letšatši: “Gobane ya rena ntwa ga se ya go lwa le batho ba nama, ke ya go lwa le meoya ye mebe ya lefaufaung, e lego magoši a semoya, le balaodi ba semoya, le babuši ba lefase le lebe le.” O re nea gape le keletšo ya ka fao re swanetšego go lwa ntwa ye go temana ya 13: “Ka fao, itlhameng ka dihlabani tša Modimo, gore mohla go le gobe le kgone go iphahlela; e tle e re ge le lwele go fihla mafelelong a ntwa le ikhwetše le ba paletše.”

Ke dihlabani dife tše Paulose a bolelago ka tšona gomme re ka itlhama bjang ka tšona letšatši le letšatši?

• Kefa: Lenaba le re hlasela ka megopolong ya rena kgafetšakgafetša ka sebopego sa, go fa mohlala, dikgopolo tša go inyatša, tokafatšo ya tswalano le motho yo mongwe ka ntle ga lenyalo la gago, lesebo le tše dingwe tše ntši. Re apara kefa ya phološo, ge re kgopela Modimo go hlwekiša menagano ya rena le go thibela dikgopolo tše fošagetšego le go tšeelwa legato ke dikgopolo tše tutuetšwago ke Modimo (Bafilipi 4:8).
• Sefahlo sa kgara: Re apara sefahlo sa kgara ge re ikgopotša gore Modimo o re lokolotše sebeng ge Jesu a hlokafala sefapanong.
• Lepanta: Re itlema lepanta la nnete ge re nyaka nnete le go phela seetšeng sa Modimo.
• Kotse: Re swara kotse go itšhireletša go mesebe ye e tukago ya lenaba ge re tsepamišetša mahlo a rena go Modimo, re bota Yena ka mo go feletšego ka katlego ya rena – le gaešita re sa bone maswao a gore e tlo direga.
• Dieta: Re apara dieta ge re kgopela Moya wo Mokgethwa go re etela pele le go re hlahla go bolela ka boloki bja Modimo le mogau gore batho bao ba se nago tswalano le Yena ga bjale, ba ka batamela go Yena.
• Tšhoša: Re tšea tšhoša ge re thoma go nagana ka dikholofetšo tša Modimo. Ke moo re kago bolela gore, bjalo ka Jesu ge a le lešokeng a lekwa ke Sathane: “Go ngwetšwe …” re le gare re tsopola dikholofetšo tša Modimo tše di sa fetogego. Lentšu la Modimo ke sebetša sa rena ntweng.

Bjalo ka badumedi, re ba le ditlhohlo. Lega go le bjalo, le ka gare ga dinako tše boima ga re a swanela go lebala ditlhamo tša rena ka ge seo se tla re dira gore re hlaselege gabonolo ke lenaba. Wicus Scheepers o itemogetše ka fao besethe ye e sa phulwego ke dikolo e phološitšego bophelo bja gagwe. Ka go itlhama ka dihlabani letšatši le letšatši maphelong a rena, le rena nakong ya maleba re ka re: “Ge ekabe e se ka besethe ye e sa phulwego ke dikolo, nkabe ke hlokafetše, eupša Morena o be a le fao gomme a ntšhireletša.” Modimo a go šegofatše.