Ke tla – Letšatši la 7

E be e le yo mongwe wa banna ba go tuma kudu ba bohlowa ka nageng. O be a na le tšhelete le maatla – a mantši. E be e le monna yo seriti sa gagwe se se nago thaka. Jobo o be a hlompha le go tumiša Modimo le gaešita go tliša dihlabelo legatong la bana ba gagwe gobane a re mohlomongwe ba dirile sebe kgahlanong le Modimo ka siphiring.

Gomme ka letšatši le lengwe, Sathane a tšwelela le barongwa pele ga setulo sa bogoši sa Modimo. Ge Modimo a mmotšiša gore o tšwa kae, a fetola ka gore o be a itshepelela le lefase go bona se se diregago. Modimo a mmotšiša ge e ba o bone Jobo. Go Jobo 1:9-11 Sathane, ka pefelo, a fetola: “Na o ra gore Jobo a ka go boifela lefeela? Ga ke re ke wena o dulago o mo šireleditše ka gohle, yena le lapa la gagwe gotee le tšohle tše a nago le tšona. O šegofaditše tšohle tše a di dirilego, gomme mehlape ya gagwe ya ata kudu. Eupša ge o ka mo tšeela tšohle tše a nago le tšona o tla go roga mahlong!” Modimo a nagana ka Jobo nakwana gomme go Jobo 1:12 o rile: “Go lokile ge, tšohle tše a nago le tšona di diatleng tša gago, fela yena mong o se ke wa mo dira selo.”

Ka letšatši le tee, Jobo o lahlegetšwe ke dilo ka moka. Bana ba gagwe ba lesome le thoto ya gagwe. Gomme moo a bego a dutše meloreng, a ingwaya dišo ka lengatana la letsopa, ke na le kgonthe ya gore Jobo o be a le kgauswi le go lahlegela ke kholofelo. Modimo o be a le kae – Yena yo a bego a mo tumiša? Ke ka lebaka la eng A be a homotše nakong ye thata ya bophelo bja gagwe? Dipotšišo tše di se nago dikarabo tša tlalela Jobo. Le gaešita mosadi wa Jobo le bagwera ba lekile go mo dira gore a dumele gore dilo tše di bego di mo hlagela e be e le ka lebaka la gagwe.

Ekaba o kile wa ikhwetša ka gare ga seemo se se bjalo sa go se be le kholofelo? Eka o molapong wa moriti wa lehu. Molapong moo Modimo a go hlokomologilego? O le kgauswi le go felela ke kholofelo. Mohlomongwe ke mo o lego gona lehono? Lenyalo la gago le na le mathata. Dikoloto di a oketšega. O eme kgauswi le lebitla le le bulegilego morago bjale gomme o jewa ke bodutu. Letšhogo le a go golofatša. Goba ga o sa na maatla ka lebaka la bolwetši. O llela go Modimo, eupša ga gona phetolo. Gomme ka gare go wena, o ipotšiša ge e ba O go lebetše?

Jobo o be a se na tlhalošo ya se se diregilego go yena. Dilo ka moka di be di le kgahlanong le se a se dumelago ka semelo sa Modimo. Lega go le bjalo, go sa šetšwe ditlhohlo tša gagwe, o re go Jobo 1:21: “Ke tlile lefaseng ke le fela, gomme ke tla tloga lefaseng ke le fela. Morena o be a file, mme bjale o tšere. A a retwe!” A tumiša Modimo le ge go be go sena se a bego a se kwešiša.

Modimo le barongwa ba šetša mesepelo ka moka ya Jobo. Sathane le bademona ba gagwe ba dira bjalo le bona. Ka gare ga bohloko, tobo le manyami, Jobo a se a dire sebe kgahlanong le Modimo goba go mo lahla. A se ke! Ka gobane o fentše teko ya tumelo ya gagwe le potego, Modimo ga se a bušetše mahumo a Jobo fela, eupša A mo fa wona gabedi. Go feta fao, go Jobo 42:5 re bala mantšu a Jobo: “Ke be ke kwele ka wena ka go anegelwa, eupša bjale ke iponetše wena ka a ka mahlo.” Nakong ye thata bophelong bja Jobo, o ile a tseba Modimo ka tsela e mpsha. Go Baheberu 13:5 Modimo o re: “Nka se tsoge ke le tlogetše, ebile nka se tsoge ke le lahlile.”

A re kgethe go tsepamišetša mahlo a rena go Modimo go sehla se sengwe le se sengwe sa maphelo a rena. A re tsebe gore, le dihleng tša go homola, maswabii goba manyami, A ka se re tlogele goba go re lahla. A re fenyeng teko ya tumelo. Go kaone kudu go kwa go opša ga magofsi go tšwa legodimong, go e na le diheleng (gobane bobedi ba lebeletše). Modimo a go šegofatše.