Ke tla – Letšatši la 6

Ke kwele kanegelo morago bjale ya baratani bao dipolane tša bona tša go aga di amogetšwego tša ntlo ya bona ya pele. Ba be ba thabile go thoma go aga. Nakong ya kgato ya ditokišetšo moo baagi ba hlwekišago lefelo pele ba epa motheo, ba bile le lepheko. Leswika la go tia le hweditšwe moo go bego go swanetše go ba phapoši ya bodulo go ya ka polane ya go aga.

Morago ga diteko tša go palela tše ntši go ka epolla letlapa le legolo la go imela, baagi ba felelwa ka kholofelo ya go le ntšha. Baagi ba dumela go tlogela leswika gomme ba fetoša polane ya go aga ka tsela ye nngwe go ka šomiša leswika bjalo ka motheo o bohlokwa ka phapošing.

Le rena ka dinako tše dingwe re itemogela ditlhohlo maphelong a rena. Mohlomongwe tlhohlo ya gago ke lebaka la gore o modumedi fela lefelong la gago la mošomo gomme o itemogela twantšho ya go se fele ka lebaka la tumelo ya gago. Goba mohlomongwe o amogetše ditaba tše mpe mabapi le tša maphelo a gago; ga o šome le ge o rometše di-CV tše ntši; pula e tšwela pele go se ne le ge o rapelela kimollo go komelelo mosegare le bošego; goba mohlomongwe o lahlegetšwe morago bjale ke ngwana yo a sa belegago yo o bego o mo rapelela le go mo letela nako e telele. O rapela bjang ga bjale? O sa eme o tiile tumelong ya gago, o bota Yo a abelago?

Go 1 Bakorinte 16:13 re bala gore: “Phafogang, le tieng tumelong, le beng le sebete, le tiiše maatla.” Mopesalome o ngwala go Pesalome 125:1: “Ba ba botilego Morena ba etša thaba ya Sione, yona e sa šikinyegego, e ka se kego ya timelela.” Go phetolelo ye nngwe motho yo a emego a tia tumelong o bapetšwa le leswika leo le ka se tlošwego ke sekuki goba kepi. O ema a tia.

Le ge ka dinako tše dingwe re ka ikwa re fokola kudu go ka tšea kgato e tee go ya pele, re ka tseba gore Modimo o tseba maemo a rena. Go 1 Bakorinte 10:13 re bala gore: “… Modimo o a botega, gomme a ka se le lese le lekwa ka tše di kago le palela.” Gomme go 2 Bakorinte 12:9 go ngwetšwe : “Kgaugelo ya ka e go lekane, gobane maatla a ka a tiile kudu mo go ba ba fokolago.”

A re be bjalo ka leswika la go tia, le emego la tia ka tumelo go sa šetšwe maemo a ditlhohlo mola re ikgopotša ka bokgoni bja Modimo bja go ka re fa katlego. Ka nako ya maleba, ge re fentše teko le go amogela katlego, seemo se se boima se ka ba “motheo o bohlokwa” tumelong ya rena go re gopotša ka boloki bja Modimo. Modimo a go šegofatše.