Ke tla – Letšatši la 5

Mengwaga e mmalwa ya go feta balemi ba lesometee tikologong ya komelelo ya Williston kua Kapa Leboa ba kopane polaseng ya Rietfontein. Le ge dipelo tša bona di be di tletše ka kholofelo ya gore lori ya bona ye e bego e tletše ka dijo tša diphoofolo tša bona e be e tlo fihla, ba bile le dipelaelo. Batho fela ka nnete ba ka bula dipelo tša bona ba neela ka selo se bohlokwa gape se se hlokegago? Dipolaseng tše dingwe diphoofolo di be di thomile go hwa ka lebaka la tlala ye e nyalelanago le komelelo yeo. Go tše dingwe, diphoofolo di bolailwe ka ge dipanka di gana go ba adima balemi tšhelete ye oketšegilego go rekela diphoofolo tša bona dijo ka lebaka la sekoloto sa bona se se bego se tlo oketšega. Letšatši le letšatši balemi ba be ba swanetše ke go theeletša dillo tša diphoofolo tša bona tše di swerwego ke tlala – mola dinakong tše dingwe ba be ba se na le dijo magaeng a bona tše ba ka di beago tafoleng.

Mengwaga e mmalwa ya go feta Radio Tygerberg 104fm, seteišene sa radio se ke se šomelago kua nkasehlakahlakeng sa Kapa, ka tirišano le Adri Williams wa mokgatlo wo e sego wa mmušo se thomile protšeke e bitšwago SOS100. Protšeke ye e file batheeletši monyetla wa go ka tsenya letsogo go ka thuša balemi ba ba hlokago. Ka ge ditshenyagalelo tša dinamelwa di be di pateletšwe ke MAN Truck gomme Bus le Pick n Pay ba neela ka dijo go balemi le bašomi ba bona, sente ye nngwe le ye nngwe ye e neetšwego ke batheeletši e šomišitšwe go rekela diphoofolo dijo.

Mathomong re be re holofetše go ka tlatša lori e tee, re romele ditone tše 36 tša dijo tša diphoofolo (tše bitšago R132 000). Re ile ra makala kudu, pele lenaneo la mesong le fela, leo ke bego ke le karolo ya lona, ra amogela ditaba tša gore re na le tšhelete ye e lekanego ka pankeng go ka romela lori ya pele ye e rwetšego dijo tša diphoofolo kua Williston. Ge meso yeo e fela re be re na le tšhelete ya go feta milione tša diranta ye e neetšwego gomme dilori tše dingwe gape tše senyane tša romelwa fao.

Ge ba bona lori ya pele e tsena diferong tša polase ya Rietfontein kua Williston, letšatšing la go fiša la Karu, bontši bja balemi ba bile le maikutlo a go fapanafapana. Ba bangwe ba ile ba swanela ke go metša mare kudu go kolobiša megolo ya bona ye e bego e omile. Seetša sa Modimo sa bonega boemo bjo bo bego bo naganwa go ba bjo bose bja go se be le kholofelo. O kwele thapelo ye nngwe le ye nngwe ya tlalelo ya balemi ye ba e rapetšego ge ba le gare ba sepela gare ga diphoofolo tše di swerwego ke tlala goba mohlomongwe bošego ba le noši mašakeng a bona a diphoofolo, goba ba khuname pele ga Modimo fela yo a Phelago, ba phuphuthela katlego go Yena. Ga a kwa dithapelo tša bona fela – gape O kgwathile batheeletši go ralala le naga go bula dipelo tša bona go ka neela.

Ka dinako tše dingwe re ikhwetša re le ka gare ga maemo a go swana le balemi bao ba letetšego kua Rietfontein. Re na le kholofetšo ya katlego ye e tlago, eupša ka gobane ga go banale selo se kgodišago, re sa katana le pelaelo gomme re hwetša meoya ya rena e huduegile. Go Pesalome 43:5 mopesalome o ngwetše: “Wena pelo ya ka, o reng o hlokofetše gakaaka? O reng o ferekane? Tshepha Modimo, gobane ke tla buša ka mo tumiša, yena Mophološi wa ka, Modimo wa ka.” Gomme go Baroma 12:12 re bala gore: “Le thakgatšwe ke kholofelo ye le nago le yona; ge le na le matshwenyego le se a felele pelo; le dule le rapela.”

Le ge ka nako e nngwe re ka felela ke kholofelo ge re sa hwetša phetolo ya semeetseng go dithapelo tša rena, go bohlokwa go kgetha go tšwela pela go tumiša Modimo le go bea tshepo ya rena go Yena. O kwa thapelo ye nngwe le ye nngwe ye re e rapelago. Ge e le gabotse, re bala go Kutollo 8 gore dithapelo tša bakgethwa di tšwewa lefaseng ke barongwa bao ba di ntšhetšago bjalo ka seorelo pele ga setulo sa bogoši sa Modimo.

O ka nagana myemyelo sefahlegong sa Modimo ge lori e tsena diferong kua Rietfontein? Bana ba Gagwe ba be ba botega ka go neela gomme nako ya kimollo ya fihla go balemi bao. “Lori” ya gago le yona e ka ba e le tseleng. A re tšweleng pele go tumiša Modimo ka yo e lego Yena – e se ka se re se nyakago go Yena. Modimo a go šegofatše.