Ke tla – Letšatši la 4

Ka 2009, Jan Koum le Brian Acton ba šomile Yahoo! Bobedi ba tšere sepheto sa go dira dikgopelo tša mošomo go khamphani ye kgolo ya mokero wa poledišano ya inthaneteng, Facebook. Ka madimabe, bobedi dikgopelo tša bona tša mošomo ga di a amogelwa. Ka go nyama, bobedi ba tšea sepheto sa go thoma go aga platefomo e mpsha ya dipoledišano tša inthaneteng go megalathekeng ya maemo a godimo (di-smartphone) ye e tsebjago ka WhatsApp.

Mengwaga ye mehlano morago, ka 2014, Facebook e rekile WhatsApp ka dibilione tše $19 go tšwa go Koum le Acton. Tshepetšong, Koum o bile CEO ya WhatsApp, a šomela Facebook. Ga go tsebje gore maemo a Acton a bjale ke afe. Go tloga mola e rekwago, badiriši ba WhatsApp ba oketšegile kudu. Ba fetile palo ya dibilione tše 1,5 ba dira gore WhatsApp e be tirelo ya melaetša e kgolo kudu lefaseng.

Ka tsela ye e swango le ya Koum le Acton, le rena re itemogela mejako ye e tswaletšwego nako le nako. Re dira, go fa mohlala, dikgopelo tša mošomo go “khamphani ya ditoro” gomme tša se amogelwe; tswalano ye re bego re holofetše gore e tla tliša lenyalo ya fela; lenyalo le o le lwetšego le go le rapelela le fela ka tlhalo; goba molwetši yo o mo rapeletšego mosegare le bošego a hlokafale.

Dinakong tša manyami goba tša mejako ye e tswaletšwego, go bohlokwa kudu go gopola se se lego bohlokwa. Modimo ga a fetoge. O šoma ka ntle ga nako le lefelo bjalo ka ge re tseba gomme o tseba se se re emego ka pele. Ka bomadimabe, mojako o tswaletšwego o a kwešišega ge go naganwa ka tša nako ye e fetilego. Lega go le bjalo, ke go nagana ka tša nako ye e fitilego mo re lemogago gore lebati le le tswaletšwego le o bego o le befetšwe ka lona ge e le gabotse e be e le tsela ya Modimo ya go go šireletša go kwa bohloko le go feta goba go dipheto tše fošagetšego, ka ge a be A na le selo se bohlokwa go wena nakong e tlago.

Go Kutollo 3:8-9, Modimo o re: “Tše le di dirago ke a di tseba. Ke le buletše mojako wo o lego mo pele ga lena, gomme ga go motho yo a kago o tswalela.” Modimo o swere dinotlelo tša go tswalela goba go bula mejako. Re hloka fela ke go mo tshepha – le gaešita ge maemo a sa kwešišege. Go Jesaya 55:8-9 O re gopotša gore: “Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena.”

Ke nagana ka se se ka bago se diregile ge Koum le Acton ba be ba hweditše mešomo go Facebook ka 2009. Ekaba WhatsApp e bile gona? Ke a kgola gore bobedi ba a iteboga lehono ka ge dikgopelo tša bona tša mošomo di sa amogelwa. Ba dirišitše mojako o tswaletšego bjalo ka tutuetšo go tla le kgopolo ye e nolofatšago poledišano lehono.

Ke manyami afe ao o itemogelago wona ga bjale? Se senye nako o lebeletše mojako o tswaletšego. O ka lahlegelwa ke monyetla wo le o tlišago wa go gola le go tutuetšwa. Modimo o tseba se a se dirago. Lethabo la mojako o bulegilego o lateleago o ka go thabiša kudu. Modimo a go šegofatše.