Jesu, Mesia wa rena – Letšatši la 9

“Thabang gagolo, lena ba Sione! Hlabang mekgolokwane, lena ba Jerusalema! Bonang kgoši ya lena e tla go lena! O tla ka megobo le mekgolokwane, fela ke moikokobetši, monamelapokolo; o nametše pokolwana, namane ya pokolo. Morena o re: ‘Ke tla amoga Israele dikoloi tša ntwa, le Jerusalema ka e amoga dipere tša ntwa; mara a ntwa le mesebe di tla robaganywa. Kgoši ya lena e tla begela ditšhaba khutšo; e tla buša go tloga lewatleng go ya lewatleng, go tloga Yufratese go ya mafelelong a lefase.’ ” Sakaria 9:9-10

Seprofeto sa Sakaria se boletše e sa le pele ka go tsena ga Kriste ka phenyo Jerusalema. Dipontšho tša mekgotheng ke tša mengwagakgolo. Batho ba ya mekgotheng go hlagiša tumelelo ya bona le, goba thulano ya bona go, selo goba motho.

Ka madimabe, mašaba a fetogafetoga gomme gantši a huetšwa.

Mekgotha ya Jerusalema e be e tletše ka batho bao ba tlilego Monyanyeng wa Paseka. Gomme ba kwele gore Jesu, Mesia yo kgale a bego e letetšwe, yo a tsošitšego motho bahung, o be a le tseleng go ya motseng. “Ke moka ba rema makala a mepalema ba ya go mo gahlanetša, ba phepela ba re: ‘A go tumišwe Modimo! A go retwe yo a tlago a romilwe ke Morena! A go retwe yena Kgoši ya Israele!’ ” (Johanese 12:13)

Ba ka ba ba makaditšwe ke gore Mesia wa bona ga a tla a nametše pere ya ntwa, go menola lenaba le go hloma mmušo wa gagwe. Go e na le moo, o tsene motseng ka pokolo, sešupo sa khutšo.

Meoya ye mebe e be e le mošomong. Jesu, yo a ekilwego ke Judase ka dipapetlana tše 30 tša silibera, o ahloletšwe lehu. Pilato o be a nyaka go mo nea tebalelo, le ge go le bjalo, maikutlo a batho a be a fetogile. Ba be ba se sa opela dihosana go Kgoši ya Israele, go e na le moo, ba goeletša, “Mmapole sefapanong! Mmapole sefapanong!” (Lukase 23:21)

Pilato, morago ga go palela go bolela le batho le baprista ba bagolo, o ile a ineela go dinyakwa tša bona.

Judase o ile a itshola kudukudu ka se a se dirilego. O lekile go bušetša tšhelete, eupša baprista ba bagolo ba gana go e amogela. Judase a lahlela dipapetlana tša silebera tše 30 lebatong la tempele, a tloga gomme a ya go iphega. Baprista ba bagolo ba tšere sephetho sa go šomiša “tšhelete ya madi” go reka tšhemo ya mmopi wa dipitša, ya ba serapa sa go bolokela bašele.

Ditiro tša bona di phethagaditše diprofeto tša Sakaria (11:12-13) le Jeremia (32:6-9) tše di boletšwego mengwagokgolo pele. Polelo ka Bibeleng ya gore – tše Mpsha di utilwe go tša Kgale, tša Kgale di utollwa go tše Mpsha – gape ke nnete.