Jesu, Mesia wa rena – Letšatši la 10
Go amogela Jesu bjalo ka Mesia
(Di)temana ya Bibele
LUKASE 24
LUKASE 24
Ke moka a re go bona: “Tše ke ilego ka le botša tšona mola ke sa na le lena šedi; tšohle tše di ngwadilwego ka melaong ya Moshe le ka dipukung tša baprofeta le ka dipesalomeng mabapi le nna di swanetše go phethega.” Ya ba gona a ba sedimošago ditlhaologanyo gore ba kwešiše Mangwalo a Makgethwa … Lukase 24:44-45
Go histori ka moka ya setšhaba sa Baheberu, Modimo o holofeditše Bajuda gore o tla romela Mesia go ba buša. O tla ba Kgoši ya bona le Moprista yo Mogolo, a ba boelanya le yena le go fediša meoya ye mebe ye e lwago kgahlanong le bona. Mesia o tla kgethwafatša bao ba botegago gomme ditšhegofatšo tša gagwe e tla ba tša ditšhaba ka moka.
Ka tlase ga Modimo, baprofeta ba utolotše dintlha tše itšego mabapi le boitšhupo bja Mesia le pheletšo ya gagwe. Barongwa ba lemošitše batho gore matswalo a Mesia a be a le kgauswi le gore Boradinaledi ba a badile dinaleding.
Bibele e bolela ka batho bao ba boditšwego pele ka tiraglo ye e bohlokwa kudu. Ka ntle le Maria le Josefa, Sakaria le Elisabetha (batswadi ba Johanese Mokolobetši) go bile le Simeone le Anna, moprofeta wa mokgekolo, bao bobedi ba bego ba letile ngwana Kriste tempeleng.
Simeone o kukile ngwana Jesu ka matsogo gomme a tumiša Modimo gore kholofetšo ye a e filwego ke Moya wo Mokgethwa, ya gore a ka se hwe pele a bona Kriste, e phethagetše (Lukase 2:26).
Ge Anna a bona ngwana Jesu, o lebogile Modimo le go bolela ka yena go bohle (Lukase 2:38).
Matswalo a Jesu a ile a se nyatšwe (gaešita le Kgoši Herode) gomme ga a swanelwa go nyatšwa bjale. Le ge go le bjalo, batho ba bantši ba tla keteka Krisemose ka ntle le kgopolo ya ngwana Kriste, mpho ya Modimo go rena ka moka.
Morago ga tsogo ya gagwe bahung, Morena wa rena o kgadile barutiwa ba gagwe. O rile, “Aowii, lena! Ga se ka ge le hloka kelelo! Le diega bjang go dumela tšohle tše di boletšwego ke baprofeta! Na kgane e be e se tshwanelo gore Mesia a tlaišwe ka dilo tše, a kgone a yo ba letagong la gagwe legodimong?” A ba hlalošetša tše di boletšwego ka Mangwalong ohle a Makgethwa mabapi le yena go thoma dipukung tša Moshe le tša baprofeta ka moka (Lukase 24:25-27).
Re ba lehlogonolo go ba le Bibele. Jesu yo a tsogilego bahung o re ruta dinnete tše a di rutilego barutiwa ba gagwe. Ake Moya wo Mokgethwa o re hlohleletše go kwešiša dithuto tša gagwe le go di diriša maphelong a rena.
