Jesu, Mesia wa rena – Letšatši la 8

“Ke roma motseta wa ka gore a yo mphulela tsela. Ke gona Morena yo le mo nyakago a tlago tla Tempeleng ya gagwe ka tšhoganetšo. Motseta yo le dumago go mmona o tla tla a bega kgwerano ya ka,” o realo Morena Ramaatlaohle. Malakia 3:1

Puku ya Malakia, puku ya mafelelo ka go Testamente ye Tala, e ngwetšwe magareng ga 450–425 BC. Tempele e be e sa tšo agwa gape, eupša boitshepo bja Bajuda bo be bo le fase. Go be go le nako e thata kua Juda.

Ba be ba boa bothopša ka dikholofelo tše kgolo kudu. Bjale, mo go nyakilego go e ba mengwaga ye 100 ka morago, ba be ba ikwa ba sa šireletšega, ba be ba boifa tlhaselo ya lenaba. Go oketša moo, ba be ba lebeletšane le tlala ka ge komelelo e šoro e be e wiša ekonomi. Se sempe le go feta, Mesia o be a sa tla.

Ba botšišitše ka lerato la Modimo le toka. Ke ka lebaka la eng ba swanetše go hlankela Modimo mola badiradibe ba atlega?

Malakia e be e le moprofeta wa nnete. Ka ntle le pelaelo, o bontšhitše Bajuda gore boemo bja bona bo bile gona ka lebaka la dibe tša bona.

O ahlotše mekgwa ya bomenetša ya baprista go senya kgwerano ya Modimo. Ga ba tšea mešomo ya bona ya tempeleng bjalo ka e bohlokwa gomme ba be ba sa hlomphe Modimo, gaešita le go amogela meneelo ye e nago le bosodi gore e dirwe dihlabelo aletareng.

Malakia o be a sola batho ka mo go swanago. Ba be ba sa nee Modimo tše kaonekaone gomme phatlalatša ba belaela ge e ba go be go na le moputso wa nnete wo motho a ka o hwetšago go hlankeleng Morena.

Malakia o lemošitše gore Morena o kgauswi. Gomme, phapano magareng ga baloki le bakgopo, magareng ga bao ba hlankelago Modimo le bao ba bego ba sa mo hlankele, e tla ba molaleng gore bohle ba e bone.

Ke mang motseta yo a bego a tla tla pele ga Mesia temaneng ya rena lehono? Jesu ka noši o tsebagaditše gore motseta e be e le Johanese Mokolobetši. O tla tla bjalo ka Eliya, ka ge baprofeta le mangwalo a profetile (Mateu 11:10-14).

Se Kriste a se boletšego ka Johanese se kgonthišitšwe gore Jesu ke Mesia gomme letšatši la Morena le fihlile.