Jesu, Mesia wa rena – Letšatši la 7

“Re tswaletšwe ngwana! Re filwe morwa! E tla ba moaparankwe. O tla bitšwa: Moeletši yo a makatšago, Modimo yo maatla, Tate wa go sa felego, Kgoši ya khutšo.” Jesaya 9:5

Baprofeta ba Modimo ba be ba tutuetša ke Moya wo Mokgethwa. Ka go se boife ba utolotše thato ya Modimo. Ditherong tša bona le dithutong, ka go se kgaotše ba be ba hlasela bobe bjo bo bego bo tlwaelegile setšhabeng sa bona. Melaetša ya bona ka mehla e be e sa amogelwe gomme bontši bja bona ba hwetše tumelo ya bona.

Jesaya e be e le yo mogolo wa baprofeta ba Baheberu. O belegwe kua Jerusalema ka 765 BC (pele ga Kriste) gomme ka mengwaga ye 25, a amogela pitšo ya Modimo go ba moprofeta (Jesaya 6:8).

Diprofeto le ditiragalo tše Jesaya a boletšego ka tšona pele di be di nepile, a ka be a be a nea pego ya hlatse ye e bonego ka mahlo ya bophelo bja Jesu. O ngwetše ka tlhago ya motho ya Mesia, matswalo a gagwe a mohlolo le dibopego tše pedi tša bodiredi bja gagwe.

Jesaya o rile Mesia o tla fodiša le go phagamiša batho ba gagwe semoyeng. “Moya wa Morena, Mong wa bohle, o na le nna. Yena o mpeile gore ke yo begela baikokobetši ditaba tše dibotse, ke bee ba ba nyamilego pelo, ke begele dibofša khunologo …” (Jesaya 61:1)

Mesia gape o tlo fodiša bogole bja mmele. “Mahlo a difofu a tla bona, ditsebe tša ditholo tša kwa. Dihlotša di tla tshelatshela bjalo ka kgama, le dimumu tša duduetša di thabile.” (Jesaya 35:5-6)

Puku ya Jesaya e tletše ka tshedimošo e ntši, gomme o hloka go e bala ka kelehloko. Temaneng ya rena ya lehono, go na le temana ye gantši re e hlokomologago. E bolela ka Krisemose ya pele – “Re tswaletše ngwana”.

Kgale pele o belegwa, Modimo o go file mpho ya gago ya pele ya Krisemose. Ke mpho e botse kudu ye o ka e amogelago. Lerato la Modimo go wena ke le legolo kudu, Tate o go file morwa wa gagwe yo a mo ratago kudukudu – Mesia yo kgale a bego a letetšwe, Moeletši yo a makatšago, Modimo yo maatla, Tate wa go sa felego, Kgoši ya khutšo.

O go file morwa wa gagwe, gore e be Tatago le wena.