Jesu, Mesia wa rena – Letšatši la 6
Dafida, o šegofaditšwe ka ditalente tše ntši
(Di)temana ya Bibele
Pesalome 110
Morena le kgoši ye a e kgethilego
MATEU 22
Jesu o botšiša gore na Mesia ke mang
MATEU 16
Morena o rile go kgoši, mong wa ka: “Dula ka letsogong la ka la mmagoja ke be ke tle ke go fenyetše manaba a gago.” Pesalome 110:1
Matšatšing a bapatriareka, Modimo o tšweleditše dinnete tše ntši, ka baprofeta ba gagwe, mabapi le Mesia yo a tlago. O tla belegwa ke kgarebe kua Betlelehema, batho ka moka ba tla šegofatšwa ka yena, gomme o tla fenya diabolose le maatla a bobe. O tla tliša khutšo go ditšhaba tše ntši le go hloma mmušo wa go ya go ile.
Go latela mehlaleng ya bona go tlile Dafida, setlogolo sa Abrahama, Jakobo le Juda. Dafida o be a diša dinku tša tatagwe le go hlama dikopelo go di letša ka harepa ya gagwe. Moprofeta Samuele o boditšwe ke Modimo go yo tlotša Dafida, go ba kgoši ye e latelago ya Israele. Bophelo bja Dafida bo ile bja fetoga.
Ga a ba kgoši le semeetseng. Bjalo ka gauta, pele o ile a lokišetšwa. E bile tshepetšo ya mengwaga e mentši, nakong yeo Dafida a ilego a swanela ke go fenya mathata ao a tšhošetšago bophelo le tlhomaro ye e sa lokafatšwago diatleng tša Kgoši Saulo, yo lehloyo la gagwe go Dafida le bakilego ke tseba (1 Samuele 18:7).
Dafida o ile a tšhabela ditikologong tša mašoka a kotsi moo a phetšego bophelo bja bahudugi, ka mehla a tšhaba madira a Saulo. Dafida gantši o be a le tlalelong. O phophothetše Modimo gore a mo hlakodiše (Pesalome 109:26).
Gantši o be a hlagiša maikutlo a gagwe ka go hlama dipesalome tše buduletšwego ke Modimo. Dipesalome tša gagwe di utolla gore go tlaleletša go ditalente tša gagwe tše ntši, Moya wo Mokgethwa gape o neile Dafida mpho ya seprofeto.
Temaneng ya rena ya lehono, Dafida o lebelela ka tebelelo go letšatši ge Kriste, Mesia, a tlago buša. E tsopotšwe ke Kriste ge a botšiša bafarisei, “Na le reng ka Mesia? Ke setlogolo sa mang?” Gwa se be le yo a kgonago go mo fetola (Mateu 22:41-45).
Dipotšišo tša Morena wa rena di be di sa lebišwa fela go Bafarisei. O botšiša barutiwa ba gagwe potšišo e swanago. Ke karabo ye a nyakago go e kwa go tšwa go yo mongwe le yo mongwe wa rena. Tumiša Modimo ge e ba, bjalo ka Simone Petrose, o ka re go Jesu, “Ke wena Mesia, Morwa wa Modimo yo a phelago.” (Mateu 16:16)
