Jesu, Mesia wa rena - Letšatši la 4
Naledi ye e phadimmego kudu
(Di)temana ya Bibele
NUMERI 24
MATEU 2
MIKA 5
Modimo o beela setšhaba moetapele wa go tšwa Betlelehema
“Ke bona kgoši a le kgole; ga se a tšwa a fihla, fela o tla tla. O tla rotoga ditlogolong tša Jakobo bjalo ka naledi. O tla tšwa go Baisraele bjalo ka naledi ya mosela. O tla pšhatlaganya Bamoaba dihlogo, a šilaganya magata a setšhaba ka moka sa Sete.” Numeri 24:17
Bakriste lefaseng ka bophara ba keteka sehla sa Advente, diSontaga tše nne pele ga matswalo a Kriste. Seprofeto sa Bileamo se hlaloša Mesia bjalo ka naledi, yo a tlago buša le go šilaganya maatla a bobe ao a gatelelago batho ba gagwe.
Bileamo e be e le ramaselamose yo a bego a dula Moaba. Kgoši ya Moaba o be a boifa setšhaba sa Israele seo se bego se kgobokane mellwaneng ya gagwe, se tšhošetša go šwahlela naga ya gagwe tseleng ya bona go ya Nageng ye e Holofeditšwego.
O kgopetše Bileamo gore a mo thuše, a mo holofetša moputso o mogolo ge a a ka rogaka Baheberu le go dira gore ba fenywe. Bileamo o ile a šegofatša Baheberu go e na le go ba rogaka, gomme seo sa befediša Balaka.
Seprofeto ka naledi se tšwa go Jakobo (ntlo ya Juda) se tlišitše tumelo, magareng ga Bajuda, ya gore matswalo a Mesia a tla tsebagatšwa ke naledi.
Boradinaledi (banna ba bohlale) le bona ba dumetše seo gape. Ba tlile Jerusalema ba botšiša, “E kae kgoši ya Bajuda ye e sa tšogo tswalwa? Re bone naledi ya gagwe e rotoga ka bohlabela, gomme re tlile go mo khunamela.” (Mateu 2:2)
Moprofeta Mika o neile karabo: Morena o re, “Wena Betlelehema ya tikologong ya Efrata, le ge o le wo mongwe wa metsana ye menyenyane kudu mo Juda, go wena go tla tšwa mmuši wa Israele yo a tlago ntlhompha, yo lešika la gagwe e lego la bogologolo le mehleng ya kgale.” Betlelehema gape e be e bitšwa Efrata. (Mika 5:1)
Ka gona Boradinaledi, ba boditšwe ka sephiring ke Kgoši Heroda gore Mangwalo a utolotšwe gore ngwana Kriste o tla belegwa Betlelehema, ba ile fao.
Ba be be thabile kudu go bona naledi yeo ba bego ba e latela e ema godimo ga ntlo moo ngwana Kriste a bego a le gona le mmagwe, Maria. Ba khunama fase, ba mo khunamela le go mo nea dimpho tša gauta, seorelo le mira.
Krisemose ye, le wena o ka ba o abelana dimpho le bao o ba ratago. Mpho e kgolo ye o ka abelanago ka yona ke lerato la Modimo ka Jesu Kriste, Mophološi le mogwera wa rena.
