Jesu, Mesia wa rena - Letšatši la 3
Seprofeto sa Jakobo
(Di)temana ya Bibele
GENESE 49
MATEU 1
Ba lešika labo Jesu Kriste
“Juda o tla swara molamo wa bogoši. Ditlogolo tša gagwe di tla buša ka mehla. Ditšhaba di tla mo tlišetša diloba, tša mo hlompha.” Genese 49:10
Jakobo e be e le morwa wa Isaka le setlogolo sa Abrahama. E be e le motho wa semelo sa boradia gomme kanegelo ya Bibele ya bophelo bja gagwe ga e hlokomologe diphošo tša gagwe go hlalefetšeng morwarragwe, tatagwe le molome wa gagwe go ikhola.
Jakobo e bile mokgathatema yo bohlokwa tlhabollong ya setšhaba sa Baheberu. Dikgoro tše 12 tša Israele di latiša lešika la tšona go barwa ba Jakobo.
Letšatši pele a hlokofala, Jakobo o boditše barwa ba gagwe se se tlago direga go bona nakong e tlago gomme a šegofatša yo mongwe le yo mongwe wa bona (Genese 49:28).
Jakobo o boditše morwa wa gagwe wa bone, Juda, e sa le pele gore lešika la gagwe le tla buša dikgoro ka moka tša Israele go fihla go tla ga Mesia, yo dikgoro ka moka e lego tša gagwe.
Se ka nnete se diregile. Ka gobane go bile ka lešika la Juda moo motse wa bogoši wa Dafida o bilego gona.
Moapostola, Mateu, ka bokgwari o ngwetše lešika la Jesu. Mateu e be e le molekgetho ge a araba taletšo ya Jesu ya gore a mo latele. Lukase o hlaloša gore Mateu (Lefi) o emeletše moo a bego a dutše gona, moo a bego a amogela lekgetho, gomme a tlogela tšohle, go latela Jesu (Lukase 5:27-28).
Mateu o tlogetše tšohle, eupša o sepetše le tlhahlo ya gagwe le maitemogelo bjalo ka molekgetho. Di mo kgontšhitše go nyakišiša ka kelehloko le go ngwala lešika la Jesu. A go lebogwe Mateu, re kgona go latiša lešika la lapa la Morena go boela morago go Abrahama (Mateu 1:1-17).
Mašika ke ditemana tše gantši re di tabogago ge re bala Bibele. Mateu o hlatsetša ka mo go feletšego gore diprofeto mabapi le Mesia di lebišitšwe go Kriste Morena. Go direng kakaretšo ya nyakišišo ya gagwe, Mateu o utolla thulaganyo ye e phethagetšego: “Ka gona, go tloga ka Abrahama go fihlela ka Dafida go bile le meloko ye lesome le metšo ye mene; go tloga ka Dafida go fihlela lebakeng la go thopelwa Babilone go bile le ye lesome le metšo ye mene, le go tloga nakong yeo go fihlela matswalong a Jesu Kriste go bile le ye lesome le metšo ye mene.” (Mateu 1:17)
