Jesu, Mesia wa rena - Letšatši la 1
Nako ya lethabo
(Di)temana ya Bibele
LUKASE 2
GENESE 3
JESAYA 7
“Lehono kua motseng wa Dafida le tswaletšwe Mophološi yo e lego Kriste Morena.” Lukase 2:11
Nakong ya sehla sa Krisemose, batho ba emaema ba reka tše ba di hlokago. Bontši ba tla be ba le ka magaeng ba amogela baeng, ge bao ba ba ratago ba kgobokana le bona go keteka; ba bangwe ba tla be ba tšea maeto a ngwaga ka ngwaga kgole le gae. Palo ye e golago ya batho ba tla fetša Krisemose ya bona ba nnoši, ka mabaka ao ba palelago ke go a laola. Dira nako ya go ba rapelela.
Go sa šetšwe maemo a rena, lethabo le bobotse di tla be di itemogelwa ke batho ba bantši, ka gobane Bakriste lefaseng ka bophara ba tla be ba keteka matswalo a Kriste Morena – gomme matswalo a ngwana ka mehla ke nako ye botse ya lethabo.
Go sa šetšwe gore maemo a rena ka afe, matswalo a Jesu Kriste ke tiragalo ye kgale e bego e letetšwe. Ke Mesia yo a tlilego lefaseng ka sebopego sa motho, go hloma mmušo wa magodimong magareng ga batho ba Modimo.
Adamo le Efa ba bile ba pele go kwa Modimo a holofetša batho tsela ya thušo, le ge ba be ba otlwa ka go se mo theeletše. Ka go kgala noga yeo e ba arošitšego, Modimo o ahlotše noga: “Ke tla dira gore wena le mosadi le hloyane, le gore ditlogolo tša gagwe le ditlogolo tša gago di hloyane ka mehla. Ditlogolo tša gagwe di tla go pšhatlaganya hlogo, mme wena o tla ba loma direthe.” (Genese 3:15)
Ke bomang bana ba mosadi yo a bego a tlo tla lefaseng? Le ge a be a tlo tlaišega diatleng tša diabolose le bahlaka ba gagwe, o tla “pšhatlaganya hlogo ya noga” gomme a fenya.
Jesaya, moprofeta, o re nea tshedimošo e oketšegilego mabapi le boitšhupo bja bana ba mosadi. “Gona Morena, Mong wa bohle, o tla go fa sešupo ka boyena: Kgarebe e imile gomme e tla belega morwa ya mo thea leina la Imanuele.” (Jesaya 7:14)
Temogo ya gore morwa wa Maria, Jesu, e be e le Kriste Mesia ke lebaka le Bakriste ba ketekago Krisemose. O fentše diabolose Khalvari le go re boelanya le Modimo. Batho ba bantši ba tseba Jesu, eupša ga ba mo amogele bjalo ka Mesia. Ke ge fela ba mo amogela mo ba tlago itemogela tlhalošo ya nnete le lethabo la Krisemose. Ake Modimo a dire gore letšatši leo le fihle ka pela.
