Gopola maatla a gagwe – Letšatši la 14

Mark Twain o ngwetše, “Motho yo a nago le kgopolo e mpsha ke kerenke go fihlela ge kgopolo ya gagwe e atlega.” Histori, go ba gona, e tletše ka dikanegelo tša batho ba ba bego ba na le dikgopolo tše ntši, tše mathomong di sa amogelwago, gomme ka morago tša atlega le go ba dira bagale.

Selo sa go ba le kgopolo ya “go makatša” se ka ba se tsena menaganong ya barutiwa ge ba e kwa Jesu a bolela ka go hwa le go tsoga bahung. Menagano ya bona e be e tletše ka dikutollo tše mpsha tše a ba filego tšona, tša gore ke “Kriste” – wa Mesia wa Israele.

Bothata e be e le kgopolo ye ya Mesia. Ba be ba nagana bjalo ka batho ba lefase. Mesia e be e le Kgoši, mohlabani, yo a rometšwego ke Modimo, yo a bego a swanetše go menola manaba a Israele le go hloma Jerusalema bjalo ka senthara ya lefasem gape. Go be go le boima go nagana ka magore a “sešole” goba ka tša bohlabani ge go e tla go Mesia, ka gobane, go Bajuda, phološo e be e le phološo ya sepolitiki goba kgodišego ya gore ka nnete ke setšhaba sa Modimo. Ka gona, kgopolo ya Mesia a hlokafala e be se ka menaganong ya bona. E be e kwagala e le bošilo.

Ka ge re tseba, Jesu ka nnete o hlokafetše sefapanong. Matšatši a mararo ka morago, o tsogile bahung. Gannyane-gannyane, barutiwa ba lemogile gore Jesu ga a tla go lwa le Baroma eupša le Sathane. Ga a gafa bophelo bja gagwe ka lebaka la lefase, eupša bjalo ka tebalelo ya dibe tša lefase. O tšholotše madi a gagwe, e se feela go lokolla Israele, eupša gape go lokolla yo mongwe le yo mongwe yo a dumelago go yena le go mo tshepha gore a mo phološe.

Mo ke Mophološi yo ka moka re mo hlokago. A sena sebe goba bosodi, ka go ithaopa o ya sefapanong gomme a hlokafala legatong la rena.

Ka boitshepo bjo bogolo, re ka tla go yena gomme ge re dira bjalo, dibe tša rena ka moka di lebaletšwe, go ya go ile.

Ka mehla re swanetše re gopole gore ke ka lebaka la eng Jesu a tlile lefaseng. O be a tlile go tlo swaragana le sebe. Ge re lebala se, ka gona re ba kotsing ya go nyama ka mehla, gore a ka se rarolle mathata a rena. Le ge go le bjalo, ge re gopola gore o hlokafetše le go tsoga bahung, ka ge a boletše gore go tla ba bjalo, re tia maatla go tseba gore bothata bjo bongwe le bjo bongwe bjo re sa bo letelago bjo re ka itemogelago bjona tseleng, go sa šetšwe gore bo ka ba boima bjang, o šetše a rarollotše mathata a magolo kudu – taba ya go ba molato ga rena le sebe. Ka gona, o tla ema le rena mathateng ka moka a bophelo lefaseng le le welego.